Թուրքիան և Հարավային Կորեան քննարկել են ռազմավարական գործընկերության խորացումը

Թուրքիայի նախագահ Ռեջեփ Թայիփ Էրդողանը Սեուլում հանդիպել է Հարավային Կորեայի նախագահ Լի Ջե Մյոնի հետ։ Երկկողմ հանդիպումից հետո երկու երկրների ղեկավարները նախագահել են պատվիրակությունների ընդլայնված կազմով բանակցությունները, որոնք անցկացվել են փակ դռների հետևում։ Այնուհետև նրանք հանդես են եկել մամուլի ասուլիսով։

Էրդողանին և նրա կնոջը՝ Էմինե Էրդողանին, նախագահական պալատում դիմավորել են Հարավային Կորեայի նախագահն ու նրա կինը։ Կողմերը նաև ներկայացրել են իրենց պատվիրակությունների անդամներին։ Հանդիպմանը մասնակցել են Թուրքիայի արտաքին գործերի նախարար Հաքան Ֆիդանը, էներգետիկայի և բնական պաշարների նախարար Ալփարսլան Բայրաքթարը, պաշտպանության նախարար Յաշար Գյուլերը և այլ պաշտոնյաներ։

Այցից առաջ Yonhap գործակալությանը տված հարցազրույցում Էրդողանը նշել է, որ դրա նպատակն է ամրապնդել քաղաքական երկխոսությունը և ակտիվացնել երկու երկրների տնտեսական կապերը։ Նա Հարավային Կորեան դիտարկել է որպես Թուրքիայի՝ Սև ծովի ափին գտնվող Սինոպ քաղաքում նախատեսվող երկրորդ ատոմակայանի կառուցման հնարավոր կարևոր գործընկեր։

Թուրքիայի նախագահի խոսքով՝ Անկարան Հարավային Կորեային համարում է այդ նախաձեռնության համագործակցության մեծ ներուժ ունեցող գործընկեր։ Թուրքիայի հաղորդակցության վարչության ղեկավար Բուրհանեթթին Դուրանի փոխանցմամբ՝ բանակցությունների ընթացքում նախատեսվում էր քննարկել երկու երկրների ռազմավարական գործընկերության բոլոր ուղղությունները, ինչպես նաև տարածաշրջանային և միջազգային արդիական հարցերը։

Նոյեմբերի 1-4-ը նախատեսված այցի ընթացքում ակնկալվում էր նաև ստորագրել երկկողմ հարաբերությունների իրավական հիմքն ամրապնդող մի շարք փաստաթղթեր։