Թեհրանը Հորմուզի նեղուցով անցնելու արտոնություններ է տվել 4 երկրի

Իրանը Հնդկաստանի, Չինաստանի, Իրաքի և Կատարի նավերին ազատել է Հորմուզի նեղուցում գործող տարանցման սահմանափակումներից։ Այս մասին հայտարարել է Իրանի խորհրդարանի Ազգային անվտանգության և արտաքին քաղաքականության հանձնաժողովի նախագահի տեղակալ Ամիր Հայաթ Մոգադդամը, հաղորդում է ISNA գործակալությունը։

«Ներկայում Հնդկաստանին, Չինաստանին, Իրաքին և Կատարին ազատել ենք Հորմուզի նեղուցում գործող տարանցման սահմանափակումներից։ Այդ երկրների նավերն ազատորեն անցնում են, և ամերիկացիները նույնպես չեն խոչընդոտում դրանց ընթացքը», – ասել է պաշտոնյան։

Մոգադդամի խոսքով՝ բացառությունները բխում են Իրանի և նշված երկրների փոխադարձ շահերից։ Նա նշել է, որ Թեհրանը նպաստում է հնդկական նավերի անցմանը՝ հնարավորություն ստանալով Հնդկաստանից դեղամիջոցներ ներկրել։

Պաշտոնյան հավելել է, որ չինական նավերի համար սահմանված բացառությունը նպատակ ունի ապահովել Պեկինի քաղաքական աջակցությունը։

Նրա փոխանցմամբ՝ Իրանը հնդկական և չինական նավերից տարանցման վճար է գանձում, մինչդեռ Կատարի նավերին թույլատրվում է անցնել առանց վճարի։ Իրաքն ավելի վաղ նույնպես ազատվել էր նեղուցով բեռնափոխադրումների իրանական սահմանափակումներից։

Ապրիլին իրաքյան նավթատար նավերը վերսկսել էին անցումը Հորմուզի նեղուցով այն բանից հետո, երբ Թեհրանը հայտարարել էր, որ սահմանափակումները չեն տարածվելու Իրաքի բեռնափոխադրումների վրա։

Իրանի և Օմանի միջև գտնվող Հորմուզի նեղուցն աշխարհի կարևորագույն նավագնացային ուղիներից է։ Դրանով Պարսից ծոցի երկրներից միջազգային շուկաներ են տեղափոխվում մեծ քանակությամբ նավթ և գազ։

ԱՄՆ-ի և Իսրայելի՝ Իրանի դեմ սկսած պատերազմից հետո Թեհրանը սահմանափակել է նավագնացությունը Հորմուզի նեղուցով։ ԱՄՆ-ն իր հերթին հայտարարել է իրանական նավահանգիստների շրջափակման մասին։