Չինաստանի առաջնորդը վերացնում է իր իշխանությանը հնարավոր մարտահրավեր նետող գործիչներին. CNN

Չինաստանի առաջնորդ Սի Ծինփինի իշխանությունն ամրապնդվում է հակակոռուպցիոն լայնածավալ արշավի ֆոնին։ Վերջին շրջանում պաշտոնանկությունների, հետաքննությունների և ձերբակալությունների ալիքը հասել է իշխող Կոմունիստական կուսակցության ամենաբարձր օղակներին՝ ընդգրկելով նաև այն պաշտոնյաներին, որոնք նախկինում համարվում էին Սիի մերձավոր շրջապատի անդամներ։

Ինչպես գրում է CNN-ը, Չինաստանում կուսակցական պաշտոնյաները մտահոգված են, թե ով կարող է դառնալ հաջորդ թիրախը։ Միևնույն ժամանակ, Սի Ծինփինի իշխանության դիրքերը շարունակում են ամրապնդվել։ Ի տարբերություն ԱՄՆ նախագահ Դոնալդ Թրամփի, որը ստիպված է պայքարել միջանկյալ ընտրություններում իր կուսակցության դիրքերի պահպանման համար և սահմանադրորեն չի կարող պաշտոնավարել ավելի քան երկու ժամկետ, Սիի իշխանությունը, ըստ CNN-ի, ներկայումս ավելի ապահով է, քան երբևէ։

Այս շաբաթ Պեկինում նախատեսված է Կոմունիստական կուսակցության ավելի քան 200 բարձրաստիճան ներկայացուցիչների փակ հանդիպում, որը կարող է լրացուցիչ ամրապնդել Սիի ազդեցությունն ու հակակոռուպցիոն արշավը։ Հանդիպմանը մասնակիցների թիվը պատմականորեն ցածր է լինելու՝ պաշտոնյաների դեմ իրականացվող գործողությունների հետևանքով։

Հանդիպումն առանձնակի ուշադրության կենտրոնում է նաև այն պատճառով, որ այն տեղի է ունենում հաջորդ տարի նախատեսված՝ կուսակցության ղեկավարության ավելի կարևոր հավաքից առաջ։ Սպասվում է, որ այդ ժամանակ Սի Ծինփինը կձգտի ապահովել իր պաշտոնավարման աննախադեպ չորրորդ ժամկետը։

Սիի՝ ավելի քան 14 տարի տևող իշխանության ընթացքում հակակոռուպցիոն արշավի շրջանակում հեռացվել են միլիոնավոր շարքային պաշտոնյաներ։ Կուսակցության Կենտրոնական կարգապահական հանձնաժողովի պաշտոնական տվյալներով՝ 2012-2022 թվականներին կոռուպցիայի կասկածանքով հետաքննության են ենթարկվել նախարարական մակարդակի ավելի քան 500 պաշտոնյաներ։ Իսկ վերջին երեք տարում պաշտոնանկ է արվել ևս ավելի քան 410 պաշտոնյա։

Մաքրման գործընթացն ընդգրկել է նաև այն կառույցները, որոնք նախկինում համարվում էին անձեռնմխելի։ Չինաստանի Կենտրոնական ռազմական հանձնաժողովի՝ սովորաբար յոթ անդամից բաղկացած կազմից այժմ մնացել է ընդամենը երկու անդամ, որոնցից մեկը հենց Սի Ծինփինն է։ Կոմունիստական կուսակցության 24 անդամ ունեցող քաղբյուրոյի կազմում ևս այժմ 21 անդամ է մնացել։

Վերջին շաբաթներին կարգապահական հանձնաժողովը գրեթե ամեն օր տեղեկություններ է հրապարակել ձերբակալությունների, նոր հետաքննությունների և կուսակցությունից հեռացումների մասին։ Քաղաքական շրջանակներում մեծ արձագանք է առաջացրել նաև Չունցինի նախկին քաղաքապետ Հուան Ցիֆանի նկատմամբ հետաքննության սկսվելու լուրը։ Նա երկար տարիներ համարվել է քաղաքականապես կայուն դիրքեր զբաղեցնող գործիչ և պաշտոնավարել է Կոմունիստական կուսակցության վեց տարբեր ղեկավարների օրոք։

Պաշտոնանկությունների շարքում է նաև Պեկինի փոխքաղաքապետ Սիա Լինմաոն, որը դրանից ընդամենը օրեր առաջ պետական հեռուստատեսությամբ մասնակցել էր Walmart-ի ղեկավար Ջոն Ֆըրների և ամերիկյան այլ գործարարների հետ հանդիպմանը։ Նրա նկատմամբ հետաքննության մասին տեղեկությունը հրապարակվել է հանդիպումից կարճ ժամանակ անց։

CNN-ի փոխանցմամբ՝ պաշտոնյաների մի մասը ամիսներ շարունակ անհետանում է հանրային կյանքից, մինչև իշխանությունները հայտարարում են նրանց նկատմամբ հետաքննության մասին։ Այդպիսի օրինակ է Սինցզյան շրջանի նախկին ղեկավար Մա Սինժույը, որի նկատմամբ հետաքննության մասին հայտարարվել է ապրիլին, երբ նա արդեն հինգ ամիս չէր հայտնվել հանրության առաջ։

Հակակոռուպցիոն արշավը նաև թուլացրել է պաշտոնյաների միջև նախկինում ձևավորված հովանավորչական և ազդեցության կապերը։ Միաժամանակ, Սի Ծինփինը դեռևս չունի ակնհայտ իրավահաջորդ, ինչը տարբերվում է նրա նախորդների իշխանավարման շրջանից։

Կուսակցության նախկին պաշտոնյա Դեն Յուվենը CNN-ի հետ զրույցում նշել է, որ երիտասարդ պաշտոնյաներն այժմ ենթարկվում են Սիին, և առաջնորդը կարող է իր առաջադրած ցանկացած գործչին դարձնել հավատարիմ աջակից։ Նրա խոսքով՝ Սին դեռ բավական ժամանակ ունի իր թիմը ձևավորելու համար։