Գերմանիայում Gen Z-ի ցույցերին մասնակցել է 120 հազար մարդ, որոշ քաղաքներում բախումներ են սկսվել

CNN-ի փոխանցմամբ՝ շաբաթ երեկոյան Գերմանիայի մի շարք քաղաքներում ոստիկանությունը ջրցան մեքենաներ է կիրառել ցուցարարներին ցրելու համար, իսկ դիմակավորված անձինք կոտրել են խանութների ցուցափեղկերն ու թալանել առևտրային կետերը։

«Gen Z-ն կարող է դա անել» շարժման կազմակերպած ցույցերն ուղղված էին կյանքի թանկացման, կրթության ոլորտի թերֆինանսավորման, բնապահպանական խնդիրների և պարտադիր զինվորական ծառայության հնարավոր վերականգնման դեմ։ Կազմակերպիչները կոչ էին արել պահպանել խաղաղությունը, սակայն բախումներ են տեղի ունեցել հատկապես Ֆրանկֆուրտում և Քյոլնում։

Գերմանիայի ներքին գործերի նախարար Ալեքսանդր Դոբրինդտը Bild պարբերականին ասել է, որ խաղաղ ցույցերը «զավթել են ձախակողմյան բռնի խմբերն ու միգրանտների համայնքներից սադրիչները»։

Հեսսեն երկրամասի ներքին գործերի նախարար Ռոման Պոզեկն էլ հայտարարել է, որ Ֆրանկֆուրտում ցույցերին միացել է շուրջ 100 նույնականացված ձախ ծայրահեղական։ Նրա խոսքով՝ ամոթալի է, թե ինչպես է ավարտվել քաղաքում անցկացված միջոցառումը։

Ֆրանկֆուրտում, ոստիկանության տվյալներով, ցուցարարները հրկիզվող խառնուրդով շշեր են նետել արտակարգ ծառայությունների աշխատակիցների ուղղությամբ, կոտրել խանութների ցուցափեղկեր։ Զենքի խանութի ցուցափեղկերը կոտրելուց հետո ոստիկանությունը ձերբակալել է մեկ կասկածյալի և առգրավել երկու զենք։ Der Spiegel-ի հաղորդմամբ՝ քաղաքի կենտրոնում մի քանի խանութներ թալանվել են, իսկ ավելի քան 30 մարդ ժամանակավորապես բերման է ենթարկվել։

Քյոլնում ոստիկանությունը ջրցան մեքենաներ է կիրառել այն բանից հետո, երբ երթի մասնակիցներից ոմանք հրավառություն են կազմակերպել քաղաքի կենտրոնում։ Համբուրգում անկարգությունների դեմ պայքարի ոստիկանությունը միջամտել է բարիկադների հրկիզումից և արտակարգ ծառայությունների աշխատակիցների վրա հարձակումներից հետո։

Բեռլինի ոստիկանության տվյալներով՝ մայրաքաղաքում 27 ոստիկան թեթև վնասվածքներ է ստացել, իսկ գրեթե 60 մարդ ձերբակալվել է՝ գույքը վնասելու, հարձակման և արտակարգ ծառայությունների աշխատակիցներին դիմադրելու կասկածանքով։

Շարժման կազմակերպիչները հայտարարել են, որ պատասխանատվություն չեն կրում ցույցերից հետո տեղի ունեցած բռնությունների համար։ Նրանց խոսքով՝ իրենք չեն վերահսկել այն, ինչ տեղի է ունեցել հանրահավաքների ավարտից հետո։

Կազմակերպիչների տվյալներով՝ շաբաթ օրը Գերմանիայի տարբեր քաղաքներում անցկացված ցույցերին մասնակցել է շուրջ 120 հազար մարդ։ Շարժման մասնակիցները բողոքում են իրենց ապագային վերաբերող որոշումներում երիտասարդների կարծիքն անտեսելու դեմ։

Բողոքի ցույցեր են անցկացվել նաև Ֆրանսիայում, Պորտուգալիայում և Իտալիայում։ Ֆրանսիայի ներքին գործերի նախարարության տվյալներով՝ շաբաթ օրը երկրում ցույցերին մասնակցել է 320 հազար մարդ, որից 70 հազարը՝ Փարիզում։ Նախորդ երկու ցույցերին մասնակցել էր համապատասխանաբար 550 հազար և 410 հազար մարդ։

Ֆրանսիայում ցույցերը հիմնականում խաղաղ են անցել, թեև մի շարք քաղաքներում ծայրահեղական խմբեր փորձել են ներխուժել կենտրոնական հատվածներ՝ վնասներ պատճառելու և թալան իրականացնելու նպատակով։

Պորտուգալիայի մայրաքաղաք Լիսաբոնում հազարավոր մարդիկ բողոքել են վարձակալության մասին օրինագծի դեմ՝ պնդելով, որ այն կխորացնի բնակարանային ճգնաժամը։ Իտալիայում ուսանողներն ու աշխատողները ցույցեր են անցկացրել գնաճի, աշխատավարձերի լճացման և բնակարանների անմատչելիության դեմ։