Իլոն Մասկը կատակել է ընտրություններում հանրապետականների պարտության մասին՝ հարյուրավոր միլիոն դոլար նվիրաբերելուց հետո

Ամերիկացի միլիարդատեր Իլոն Մասկը կատակել է ԱՄՆ միջանկյալ ընտրություններում հանրապետականների պարտության մասին, թեև կուսակցությանն աջակցելու համար ծախսել էր հարյուրավոր միլիոնավոր դոլարներ։ Նոյեմբերի 3-ին կայացած ընտրություններում դեմոկրատները հաղթանակ են տարել՝ վերահսկողություն ստանալով Կոնգրեսի երկու պալատների նկատմամբ։ Ընտրություններն անցել են նախագահ Դոնալդ Թրամփի քաղաքականությունից ընտրողների դժգոհության ֆոնին։

«Կարծես ընտրություններին միջամտելու համար նախատեսված իմ տիեզերական լազերներն այս անգամ չաշխատեցին», — գրել է Մասկը Xսոցիալական ցանցում՝ ավելացնելով ուսերը թոթվելու էմոջի։

Ընտրարշավների ֆինանսավորմանը հետևող OpenSecrets կազմակերպության տվյալներով՝ Մասկը հանրապետականներին աջակցելու համար հատկացրել է գրեթե 500 մլն դոլար, գրում է AFP-ն։

Այսպիսով՝ նա դարձել է մեկ ընտրական շրջափուլի ընթացքում դաշնային ընտրարշավների խոշորագույն անհատ հովանավորը 2010 թվականից ի վեր, երբ ԱՄՆ-ում թույլատրվեց որոշակի հիմնադրամների միջոցով անսահմանափակ քաղաքական ծախսեր կատարել։

Միջոցների մեծ մասը փոխանցվել է հանրապետականներին աջակցող America PAC քաղաքական կոմիտեին և Senate Leadership Fund հիմնադրամին, որն օգնում է կուսակցությանը պայքարել Սենատում տեղերի համար։

Սեպտեմբերին Senate Leadership Fund-ը Մասկից ստացել է 158 մլն դոլար՝ աջակցելու Տեխասից Սենատի հանրապետական թեկնածու Քեն Փաքսթոնին։ Սակայն Փաքսթոնը պարտվել է դեմոկրատ Ջեյմս Թալարիկոյին։ Վերջինս դարձել է Դեմոկրատական կուսակցության առաջին ներկայացուցիչը, որը 1994 թվականից ի վեր հաղթել է Տեխասում նահանգային մակարդակի ընտրություններում։

Հաղթանակից հետո Օսթինում կայացած հանրահավաքում Թալարիկոն հայտարարել է, որ իր մրցակիցները ոչ միայն քաղաքական ընդդիմախոսներն էին, այլև «աշխարհի ամենահարուստ մարդը, աշխարհի ամենաազդեցիկ մարդը և ողջ վաշինգտոնյան իսթեբլիշմենթը»։