Հ1-ի ղեկավարության գլխին «ամպեր են կուտակվում». ովքե՞ր են հրաժարական պահանջողները. «Փաստ»

«Փաստ» օրաթերթը գրում է.

 Նոյեմբերի 3-ին «ՀայաՔվե» ազգային քաղաքացիական միավորումը բողոքի ակցիա անցկացրեց Հանրային հեռարձակողի խորհրդի շենքի դիմաց: Ակցիայի ընթացքում նախաձեռնության համակարգող Ավետիք Չալաբյանն ու մասնակիցները խորհրդի աշխատակազմին հանձնեցին ավելի քան 300 հանրային, քաղաքական ու մշակութային գործիչների, գիտնականների և մտավորականների ստորագրությամբ վավերացված հանրագիր: Փաստաթղթով պահանջվում է Հանրային հեռարձակողի խորհրդի նախագահ Վասակ Դարբինյանի և Հանրային հեռուստաընկերության գործադիր տնօրեն Հովհաննես Մովսիսյանի հրաժարականը, ինչպես նաև եթերային քաղաքականության անհապաղ վերանայում:

 Բողոքի ակցիայի և հանրագրի ներկայացման անմիջական առիթը սեպտեմբերի 27ին՝ 44-օրյա պատերազմի մեկնարկի օրը, Հանրային հեռուստաընկերության եթերով հեռարձակված ժամանցային համերգն էր: Չնայած հեռուստաընկերությունը հաջորդ օրը պաշտոնական ներողություն էր խնդրել տեղի ունեցածի համար և ընդունել պատասխանատվությունը, «ՀայաՔվեի» ներկայացուցիչները հայտարարեցին, որ միայն ներողություն խնդրելը բավարար չէ: Ավետիք Չալաբյանի խոսքով՝ Եռաբլուրից հիշատակի միջոցառումները պատշաճ չլուսաբանելը և երեկոյան եթերում երգիչ Թաթա Սիմոնյանի համերգը ցուցադրելը վիրավորել է զոհվածների հարազատների ու հասարակության զգացմունքները, ինչը ղեկավարության կողմից իրականացվող քաղաքականության օրինաչափ հետևանքն է:

 Հանրագրում ներկայացված են Հանրային հեռուստաընկերության գործունեության վերաբերյալ մի շարք հստակ մեղադրանքներ: Ըստ հեղինակների՝ հարկատուների միջոցներով ֆինանսավորվող լրատվամիջոցը նախընտրական և ընտրական շրջաններում չի ապահովում քաղաքական չեզոքություն ու բազմակարծություն՝ իրականացնելով իշխանամետ քարոզչություն: Գրության մեջ նշվում է, որ քաղաքական հաղորդումների, մասնավորապես Պետրոս Ղազարյանի վարած հարցազրույցների ընթացքում ընդդիմադիր տեսակետները ենթարկվում են թիրախավորման ու մանիպուլ յացիաների: Ազգային ժողովի աշխատանքները նույնպես ներկայացվում են իշխող «Քաղաքացիական պայմանագիր» կուսակցության դիրքորոշումների շրջանակում՝ լուսանցք մղելով խորհրդարանական ընդդիմության գործունեությունը: Բացի այդ, ըստ փաստաթղթի, եթեր են հրավիրվում անձինք, որոնք պառակտող կոչեր են հնչեցնում Հայ Առաքելական Եկեղեցու և ազգային-հոգևոր արժեքների դեմ։

Փաստաթուղթն ստորագրել են ավելի քան 300 հանրային գործիչներ: Նրանց թվում են «ՀայաՔվեի» խորհրդի անդամներ Մենուա Սողոմոնյանը, Ցոլակ Ակոպյանը, Հրայր Կամենդատյանը, Սայիդա Պողոսյանը, Շուշան Երիցյանը, քարոզչության հետազոտող Կարեն Վրթանեսյանը, ադրբեջանագետ Անժելա Էլիբեգովան, «Հայկական նախագիծ» ՀԿ նախագահ Էդգար Էլբակյանը և միջազգայնագետ Արմեն Մանվել յանը: Հանրագրին միացել են նաև իրավագետ Գևորգ Դանիել յանը, ՀՀ մարդու իրավունքների առաջին պաշտպան Լարիսա Ալավերդյանը, ԵՊՀ պրոֆեսոր Գուրգեն Մելիքյանը, Արցախի մշակութային ժառանգության օմբուդսմեն Հովիկ Ավանեսյանը, Արցախի ԱԺ նախկին նախագահ Աշոտ Ղուլ յանը, ԱԺ պատգամավոր Մետաքսե Հակոբյանը, երգիչներ Շուշան Պետրոսյանն ու Արսեն Գրիգորյանը (Մրո), ռեժիսոր Դավիթ Սահակյանցը, «Արար» հիմնադրամի տնօրեն Արմեն Խաչիկյանը, Alpha News-ի գլխավոր խմբագիր Տիգրան Քոչարյանը, ABC Media-ի տնօրեն Աբրահամ Գասպարյանը, քաղաքական գործիչ Նաիրա Զոհրաբյանը, ինչպես նաև հարյուրավոր այլ մտավորականներ, հանրային գործիչներ ու 44-օրյա պատերազմի մասնակիցներ:

Ակցիայի ընթացքում Ավետիք Չալաբյանը հայտարարեց, որ եթե Հանրային հեռարձակողի խորհուրդը պատշաճ արձագանք չտա և չբավարարի հանրագրի պահանջները, իրենք դիմելու են իրավական մեխանիզմների՝ Հանրային հեռուստաընկերության եթերային քաղաքականության փոփոխությանը հասնելու համար:

Մանրամասները՝ «Փաստ» օրաթերթի այսօրվա համարում