Երկիր.«Տերովին տերն ա տարել, անտերին՝ գելը»

«Երևանը համայն հայության մայրաքաղաքն է ու պետք է քաղաքը հնարավորինս գեղեցիկ ու ներկայանալի լինի։ Այստեղ որևէ մեկը կասկած չունի։Սակայն անհասկանալի մի տրամաբանությամբ անբարետես կրպակների ապամոնտաժումը սկսվեց քաղաքի արվարձանային մասից, մինչդեռ ակնհայտ է, որ զբոսաշրջիկները առանձնապես հաճախ չեն հայտնվում, ասենք Փափազյան փողոցում։ Մինչդեռ Երևանի «սիրտը» համարվող Աբովյան փողոցում հենց մայթի մեջտեղում կան խանութներ, որոնք շարունակում են անձեռնմխելի մնալ։ Այդ հագուստի խանութները լիցենզիա ստանալու ժամանակ նշվել են որպես ժամանակավոր շինություններ, ինչը ենթադրում է, որ պետք է կառուցվեին թեթև կոնստրուկցիաներով, սակայն թույլտվությունից հետո ոչ միայն փողոցի ամբողջ երկայնքով քարե պատեր են շարվել, այլև նկուղային հարկեր են փորված մայթերի վրա։ Այստեղ, փաստորեն, առկա են ոչ միայն «գեղագիտական» աղավաղումներ, այլև օրենքի և քաղաքաշինական նորմերի կոպտագույն խախտումներ։ Բավարար է հիշել միայն մի դեպք, երբ հրշեջ մեքենան հենց այդ շինությունների պատճառով չկարողացավ մոտենալ Աբովյան փողոցի շենքերից մեկին՝ բնակարանում բռնկված հրդեհը հանգցնելու համար։ Մեզ համար, անշուշտ, տարակուսելի է, թե ինչու քաղաքապետարանը քաղաքի արտաքին տեսքի վերականգնմամբ մտահոգված ապամոնտաժումը սկսեց ընտանիք կերակրող ծայրամասային մի կրպակով։ Իր այս մտադրության անկեղծությունն ապացուցելու լավագույն եղանակը կլիներ այն, որ առաջինը սկսեին ապամոնտաժվել հենց այդ «ապօրինիները»։ Վստահ ենք, որ չնայած խոստումներին, հերթը դրանց չի էլ հասնելու, որովհետև Աբովյան փողոցի մայթը զավթելն ու այնտեղ ապօրինի շինություն կառուցելը սովորական քաղաքացու ուժերից շատ է վեր։

Այնպես, որ հակված ենք մտածել, որ արվարձանների փողոցների անկյունները փոքրիկ կրպակներից ազատելուց հետո քաղաքապետի որոշումը կմատնվի մոռացության»,- գրում է «Երկիր» օրաթերթը։