Ադրբեջանի հետ խաղաղության համաձայնագրի ստորագրումը մնում է առաջնահերթություն. Միրզոյան

Մեծ գյուտ արած չեմ լինի, եթե ասեմ, որ 2027 թվականին շարունակելու ենք 2026-ին վարած արտաքին քաղաքականությունը՝ որոշակի շեշտադրումներով և փոփոխություններով։ Այս մասին Ազգային ժողովի արտաքին հարաբերությունների, տարածաշրջանային և եվրասիական ինտեգրման, եվրոպական ինտեգրման, ինչպես նաև ֆինանսավարկային և բյուջետային հարցերի մշտական հանձնաժողովների համատեղ նիստում՝ 2027 թվականի պետական բյուջեի նախնական քննարկման շրջանակում, հայտարարեց ՀՀ արտաքին գործերի նախարար Արարատ Միրզոյանը։

Նրա խոսքով՝ ինչպես նախկինում, այնպես էլ 2027 թվականին առաջնային ուշադրության կենտրոնում են լինելու Հայաստանը շրջապատող տարածաշրջանն ու անմիջական հարևանությունը։

«Ընդհանուր առմամբ, եթե բնութագրենք, ՀՀ-ի շուրջ խաղաղության և համագործակցության միջավայրի ձևավորումն է լինելու մեր առաջնային նպատակը, ՀՀ ինքնիշխանության և անկախության ամրապնդումը, մեր պետության հարատևությանը նպաստելը և ամրապնդելը»,- ասաց Միրզոյանը՝ ընդգծելով, որ այդ համատեքստում ուշադրության կենտրոնում են լինելու Հայաստանի չորս անմիջական հարևանները։

Անդրադառնալով Ադրբեջանի հետ հարաբերություններին՝ նախարարը նշեց, որ Հայաստանի հանձնառությունն է հնարավորինս արագ հասնել խաղաղության համաձայնագրի ստորագրմանն ու հետագայում դրա վավերացմանը։

«Մեր հանձնառությունն է րոպե առաջ հնարավոր դարձնել Ադրբեջանի հետ խաղաղության համաձայնագրի ստորագրումը, ապա նաև վավերացումը՝ ձեր օգնությամբ։ Մինչև դրա ֆիզիկապես հնարավոր դառնալը մենք, իհարկե, շարունակելու ենք Ադրբեջանի հետ խաղաղությունից բխող և խաղաղությունն էլ ավելի ամրապնդող մի շարք քայլերի ու համագործակցության ուժեղացումն ու ընդլայնումը, ինչպիսիք են, օրինակ, երկկողմ առևտուրը, Ադրբեջանի կողմից իր տարածքի բացումը Հայաստան եկող և Հայաստանից գնացող բեռների համար։

Վստահ եմ՝ TRIPP-ի և մյուս ծրագրերում հետզհետե նույնը կլինի՝ ադրբեջանական բեռները կօգտագործեն Հայաստանի տարածքը՝ տարանցման համար»,- նշեց Արարատ Միրզոյանը։