Լեհաստանից Ռուսաստան ռազմական բեռներ են տեղափոխել թաքստոցներով մեքենաներով․ 6 ձերբակալված

Լեհաստանի ներքին անվտանգության գործակալությունը բացահայտել և վնասազերծել է մի խումբ, որը 2023 թվականի հունիսից մինչև 2025 թվականի դեկտեմբեր ռազմական նշանակության արտադրանք է մատակարարել Ռուսաստան։

Ձերբակալվել է վեց մարդ՝ Լեհաստանի հինգ քաղաքացի և մեկ Ռուսաստանի քաղաքացի։ Խուզարկություններ են իրականացվել երեք վոյեվոդություններում՝ ընդհանուր 21 հասցեում։

Հետաքննության վարկածով՝ խմբի անդամները տարբեր ապրանքներ են ձեռք բերել, այդ թվում՝ առցանց խանութներից, այնուհետև դրանք տեղափոխել թաքստոցներով կահավորված մեքենաներով և ուղարկել Կալինինգրադի մարզ։ Բեռների մի մասը Լեհաստանի հատուկ ծառայություններին հաջողվել է կասեցնել։

Ձերբակալվածներին մեղադրանքներ են առաջադրվել լրտեսության և ռազմական նշանակության արտադրանքի ապօրինի շրջանառության համար։