«Իրանը դեմ է Զանգեզուրի միջանցքին»․ Վելայաթին՝ Փաշինյանին ուղղված հոդվածում

Իրանի նախկին արտգործնախարար, երկրի գերագույն առաջնորդի միջազգային հարցերով նախկին խորհրդական Ալի Աքբար Վելայաթին հոդված է հրապարակել իրանական «Ettelaat» պարբերականում՝ դիմելով Հայաստանի վարչապետ Նիկոլ Փաշինյանին։

«Բաց և անկեղծ՝ պարոն վարչապետի հետ» վերնագրված հոդվածում Վելայաթին քննադատել է Հայաստանի իշխանությունների քաղաքականությունը և հատկապես անդրադարձել TRIPP նախագծին՝ այն անվանելով «Զանգեզուրի միջանցք»։

Նրա խոսքով՝ հայ-իրանական հարաբերությունները շուրջ 2000 տարվա պատմություն ունեն, և այդ ընթացքում երկու երկրների միջև հարաբերություններում նման խնդիրներ չեն եղել։ Նա ընդգծել է, որ Իրանը երբեք վտանգի տակ չի դրել Հայաստանի անկախությունն ու ինքնիշխանությունը, իսկ երկու երկրների հարաբերությունները մշտապես եղել են բարեկամական։

Վելայաթին, սակայն, պնդել է, որ Փաշինյանի իշխանության օրոք Հայաստանի արտաքին քաղաքականությունը փոխվել է՝ ավելի մեծապես կողմնորոշվելով դեպի Արևմուտք, մասնավորապես՝ Ֆրանսիա, ԱՄՆ և Մեծ Բրիտանիա։ Նա նաև քննադատել է Հայաստանի և Ադրբեջանի հարաբերությունների սրումը։

Անդրադառնալով TRIPP նախագծին՝ Վելայաթին նշել է, որ Իրանը դեմ է այսպես կոչված «Զանգեզուրի միջանցքի» ստեղծմանը։ Նրա խոսքով՝ դեռևս 2021 թվականին Թեհրանում կայացած հանդիպումների ժամանակ Իրանի այն ժամանակվա գերագույն առաջնորդը հստակ հայտարարել էր այդ դիրքորոշման մասին։

Վելայաթին պնդել է, որ այդ հարցի շուրջ Հայաստանի ներկայացուցիչների հետ հանդիպումների ընթացքում իրանական կողմը զգուշացրել է Թեհրանի դիրքորոշման մասին։ Նա նաև հիշեցրել է Իրանի զինված ուժերի զորավարժությունները՝ դրանք ներկայացնելով որպես երկրի վճռականության ցուցադրություն։

«Ես Հայաստանի դեսպանին վերջնական խոսքն ասացի՝ հստակորեն, որ եթե Թրամփը և նրա դաշնակիցները ցանկանան հատել իրանական այս կարմիր գիծը, մենք կկոտրենք նրանց ոտքերը»,- գրել է Վելայաթին։

Իրանի նախկին արտգործնախարարը նաև պնդել է, որ Հայաստանի խորհրդարանը նախորդ շաբաթ հաստատել է միջանցքի կառուցումը՝ այդ քայլը որակելով որպես Հայաստանի շահերին հակասող գործողություն։

Նշենք, որ հոդվածում ներկայացված գնահատականներն ու պնդումները պատկանում են Վելայաթիին և արտահայտում են նրա անձնական դիրքորոշումը։