Ֆրանսիայում կանխվել է արյան պաշարների ոչնչացմանն ուղղված կիբերհարձակումը

Ֆրանսիայում կիբերհարձակման թիրախ են դարձել երեք սառնարանային պահեստներ, որտեղ պահվում էին նվիրաբերված արյան նմուշներ և արյան պլազմա։ Իշխանությունների փոխանցմամբ՝ հարձակումը հաջողությամբ չի իրականացվել՝ անվտանգության և ահազանգման համակարգերի շնորհիվ։

Ֆրանսիական արյան հաստատության (EFS) հաղորդմամբ՝ երկուշաբթի օրը կիբերանվտանգության միջադեպը թիրախավորել է սառնարանային ծառայություններ մատուցող ընկերությանը՝ ազդելով երեք պահեստների մոնիթորինգի և կառավարման համակարգերի վրա։

Ֆրանսիական Le Canard Enchaîné պարբերականի տվյալներով՝ հարձակվողները փորձել են փոխել սառնարանների ջերմաստիճանի կարգավորումները՝ սահմանելով +110 աստիճան՝ նախատեսված -30 աստիճանի փոխարեն։

Այնուամենայնիվ, EFS-ը հայտնել է, որ միջադեպը առողջապահական հետևանքներ չի ունեցել, իսկ արյան պաշարների կորուստ չի արձանագրվել։ Արյան հավաքման և բաշխման աշխատանքները շարունակվել են առանց ընդհատումների՝ ապահովելով հիվանդանոցների և բուժհաստատությունների կարիքները։

Ֆրանսիայի առողջապահության նախարար Ստեֆանի Ռիստի գրասենյակից նշել են, որ պահեստների վերահսկման և ահազանգման համակարգերը թույլ են տվել պահպանել արյան պաշարների անվտանգությունը։

Միջադեպի հանգամանքները պարզելու նպատակով հետաքննություն է սկսվել։ Դրան մասնակցում է նաև Ֆրանսիայի ազգային կիբերանվտանգության գործակալությունը։ Առայժմ հայտնի չէ, թե ով է կանգնած հարձակման հետևում։

Միջադեպը տեղի է ունեցել Եվրոպայում սառնարանային համակարգերի դեմ կիբերհարձակումների մի շարք դեպքերից հետո։ Վերջին օրերին հարձակումների թիրախում են հայտնվել նաև եվրոպական սուպերմարկետների սառնարանները։ Չորեքշաբթի նման հարձակման մասին հայտնել է նաև ֆրանսիական Crédit Mutuel Arkéa բանկը․ միջադեպը հնարավորություն է տվել կեղծ գործարքներ իրականացնել, սակայն բանկի փոխանցմամբ՝ հաճախորդների միջոցները չեն տուժել։