Ասիական բորսաներում տեխնոլոգիական ընկերությունների բաժնետոմսերը կտրուկ անկում են գրանցել

Ասիական տեխնոլոգիական ընկերությունների բաժնետոմսերը նոյեմբերի 6-ին կտրուկ անկում են գրանցել՝ հետևելով Ուոլ Սթրիթում արձանագրված վաճառքների ալիքին։ Ներդրողների մտահոգությունները կապված են ԱՄՆ միջանկյալ ընտրություններում դեմոկրատների հաղթանակից հետո արհեստական բանականության ոլորտում հնարավոր խստացված կարգավորումների հետ։ Այս մասին հայտնում է France 24-ը։

Առևտրային նստաշրջանի սկզբում ամենամեծ կորուստներն արձանագրվել են Սեուլի և Տոկիոյի բորսաներում։ Ներդրողները սկսել են վաճառել տեխնոլոգիական ընկերությունների բաժնետոմսերը՝ մտահոգվելով ոլորտի հետագա զարգացման հեռանկարներով։

ԱՄՆ-ում տվյալների կենտրոնների կառուցման դեմ լայն դժգոհություն կա, և միջանկյալ ընտրություններում հաղթած մի շարք թեկնածուներ խոստացել են սահմանափակել նման նախագծերը։ Ներդրողների մտահոգություններն ավելի են խորացել նաև սենատոր Բեռնի Սանդերսի՝ տվյալների կենտրոնների կառուցման ազգային մորատորիում սահմանելու առաջարկից հետո։

Վերլուծաբանների խոսքով՝ շուկայի վրա ազդել են նաև ոլորտում ընկերությունների կատարած հսկայական ներդրումների վերադարձի ժամկետների վերաբերյալ անորոշությունը, փոխառությունների արժեքի աճը և մի շարք ընկերությունների չափազանց բարձր գնահատումները։

Նյու Յորքի Nasdaq ինդեքսը նվազել է 5.5 տոկոսով՝ գրանցելով ամենամեծ մեկօրյա անկումը 2025 թվականի ապրիլից ի վեր։ S&P 500-ը կորցրել է ավելի քան 4 տոկոս, իսկ Dow Jones-ը՝ ավելի քան 3 տոկոս։

Անկումը շարունակվել է նաև ասիական շուկաներում։ Սեուլի բորսայի Kospi ինդեքսը որոշ պահերի նվազել է գրեթե 9 տոկոսով։ SK hynix-ի բաժնետոմսերը էժանացել են 10 տոկոսով, իսկ Samsung-ինը՝ 8 տոկոսով։

Տոկիոյի բորսան նվազել է 7 տոկոսով։ Kioxia-ի և SoftBank-ի բաժնետոմսերը կորցրել են ավելի քան 10 տոկոս, իսկ Advantest-ինը՝ ավելի քան 8 տոկոս։ Taiwan Semiconductor Manufacturing Company-ի (TSMC) բաժնետոմսերի 7 տոկոս անկման ֆոնին Թայվանի Taiex ինդեքսը նվազել է շուրջ 8 տոկոսով։

Ավելի քան 1 տոկոս անկում է գրանցվել նաև Հոնկոնգի, Շանհայի, Սիդնեյի և Սինգապուրի բորսաներում։

ԱՄՆ նախագահ Դոնալդ Թրամփը շուկաների անկման պատասխանատվությունը վերագրել է դեմոկրատներին՝ Truth Social սոցիալական ցանցում գրելով, որ այն տեղի է ունեցել ընտրություններում նրանց հաղթանակի պատճառով։

Միևնույն ժամանակ, նավթի գները կրկին աճել են՝ շարունակելով նախորդ օրը սկսված վերելքը։ Ներդրողները հետևում են նաև ԱՄՆ-ի և Իրանի միջև զարգացումներին, քանի որ երկու երկրների ղեկավարներն ավելի վաղ հայտնել էին բանակցություններում առաջընթացի մասին։

Օրվա ընթացքում սպասվում է նաև ԱՄՆ զբաղվածության վերաբերյալ տվյալների հրապարակումը։