Պուտինը հայտարարել է ֆինանսական կասկածելի գործարքների նկատմամբ վերահսկողությունը խստացնելու անհրաժեշտության մասին

Ռուսաստանի նախագահ Վլադիմիր Պուտինի խոսքով՝ արտասահմանյան հատուկ ծառայությունները հանցավոր ֆինանսական գործարքները քողարկելու համար կիրառում են նորագույն տեխնոլոգիաներ։ Այս մասին նա հայտարարել է «Ռոսֆինմոնիթորինգ» դաշնային ծառայության հիմնադրման 25-ամյակի առթիվ։

Պուտինի խոսքով՝ ստեղծված պայմաններում կարևոր է կատարելագործել գերատեսչության աշխատանքը։ Նա նշել է, որ «Ռոսֆինմոնիթորինգը» ձևավորել է հանցավոր ճանապարհով ստացված եկամուտների օրինականացման դեմ պայքարի ժամանակակից և արդյունավետ համակարգ։

ՌԴ նախագահն ընդգծել է, որ ծառայությունը պետք է արդյունավետորեն օգտագործի ֆինանսական հետախուզության գործիքները և ակտիվորեն ներդնի արհեստական բանականության տեխնոլոգիաները։

Նրա խոսքով՝ Ռուսաստանի ֆինանսական հետախուզությունն աշխատում է միջազգային լավագույն չափանիշներին համապատասխան, իսկ որոշ ուղղություններով նույնիսկ գերազանցում է դրանք։

Պուտինը նաև անհրաժեշտ է համարել խստացնել շուկայում կասկածելի գործարքների նկատմամբ վերահսկողությունը՝ միաժամանակ բարեխիղճ մասնակիցների համար պարզեցնելով ֆինանսական մոնիթորինգի ընթացակարգերը։

Նա ընդգծել է, որ ֆինանսական համակարգի թափանցիկությունն ու պաշտպանվածությունը Ռուսաստանի գլոբալ մրցունակության կարևորագույն գործոններից են։