ՌԴ և Ուկրաինայի ներկայացուցիչները Սպիտակ տանը մասնակցել են հրադադարի վերաբերյալ եռակողմ ասուլիսի

ԱՄՆ առաջին տիկին Մելանյա Թրամփը հույս է հայտնել, որ Ուկրաինայի՝ Ռուսաստանի վերահսկողության տակ գտնվող Օլեշկի շրջանում հաստատված հրադադարը կարող է հիմք դառնալ ավելի երկարատև խաղաղության համար։ Այս մասին նա հայտարարել է նոյեմբերի 5-ին Սպիտակ տանը տեղի ունեցած եռակողմ ասուլիսի ժամանակ, որին մասնակցել են նաև Ռուսաստանի և Ուկրաինայի ներկայացուցիչները։

«Մենք ընտրել ենք մարդկայնությունը պատերազմի փոխարեն։ Անմեղ մարդկանց կյանքը պետք է վեր լինի պատերազմի բաժանարար գծերից։ Հուսով եմ՝ Օլեշկին կներշնչի ավելի մեծ խաղաղության։ Յուրաքանչյուր նշանակալի փոփոխություն սկսվում է փոքր կայծից»,- ասել է Մելանյա Թրամփը։

Նրա խոսքով՝ սեպտեմբերին տեղեկանալով տարածաշրջանում ստեղծված մարդասիրական ճգնաժամի մասին՝ ինքը հանձնարարել է իր ներկայացուցիչ Մարկ Բեքմանին կապ հաստատել Ռուսաստանի և Ուկրաինայի հետ։ Երկու երկրներն էլ համաձայնել են համագործակցել իր հետ՝ որպես բացառիկ միջնորդի, Օլեշկիում և Խերսոնի շրջակա տարածքներում հրադադար հաստատելու, մարդասիրական օգնություն հասցնելու և խաղաղ բնակիչների անվտանգ տարհանումն ապահովելու նպատակով։

Ասուլիսին ելույթ է ունեցել նաև Ռուսաստանի նախագահի հատուկ բանագնաց Կիրիլ Դմիտրիևը։ Նա նշել է, որ ՌԴ նախագահ Վլադիմիր Պուտինը գնահատում է Դոնալդ Թրամփի՝ մարտական գործողությունները դադարեցնելու ջանքերը և աջակցել է մի շարք մարդասիրական նախաձեռնությունների, այդ թվում՝ գերիների փոխանակմանն ու ամերիկացի բանտարկյալների ազատ արձակմանը։

Ուկրաինայի նախագահ Վոլոդիմիր Զելենսկու «Ժողովրդի ծառա» կուսակցության ղեկավար Դավիթ Արախամիան Օլեշկիում հաստատված հրադադարը որակել է որպես 2022 թվականից ի վեր լարվածության թուլացման ամենամեծ քայլը։

Նրա խոսքով՝ սկզբում նախաձեռնության հաջողությանը հավատում էր մարդկանց ընդամենը 5 տոկոսը, մինչդեռ այժմ իրավիճակը փոխվել է, և մարդկանց 95 տոկոսը հավատում է նման քայլերի հնարավորությանը։

Արախամիան շնորհակալություն է հայտնել Մելանյա Թրամփին միջնորդական ջանքերի համար՝ ընդգծելով, որ հրադադարի պահպանման փորձը կարող է նպաստել ապագա խաղաղության մեխանիզմների ձևավորմանը։