Ֆրանսիայում ավտոբուսի վթարի վայր ուղղաթիռ է ուղարկվել՝ ծանր վիրավորներին տեղափոխելու համար

Ֆրանսիայի արևելքում՝ Լիոնից հյուսիս-արևելք գտնվող Լեն քաղաքում, ուրբաթ առավոտյան աշակերտներ տեղափոխող ավտոբուսը դուրս է եկել ճանապարհից և բախվել ծառին։ Պաշտոնյաների տվյալներով՝ վթարի հետևանքով կան մի քանի տուժածներ․ փոխանցում է BBC-ն։

Քաղաքապետ Իվ Քրիստենը ֆրանսիական լրատվամիջոցներին հայտնել է, որ ավտոբուսը դուրս է եկել երթևեկելի հատվածից և ընկել ճանապարհի եզրին գտնվող խրամատը՝ բախվելով ծառին։

Ֆրանսիայի կրթության նախարար Էդուար Ժեֆրեն հաստատել է, որ վթարի մասնակիցները աշակերտներ են։ Նա իր աջակցությունն է հայտնել տուժած երեխաներին՝ նշելով, որ նման պատահարները հատկապես ծանր են, երբ դրանց զոհ են դառնում երեխաները։

Տրանսպորտի նախարար Ֆիլիպ Տաբարոն հայտնել է, որ մեկնում է դեպքի վայր։

Վթարը տեղի է ունեցել տեղական ժամանակով մոտավորապես ժամը 07։00-ին։ Դեպքի վայրում աշխատում են արտակարգ իրավիճակների ծառայությունները։ Ծանր վնասվածքներ ստացած տուժածներին մասնագիտացված հիվանդանոց տեղափոխելու համար ուղղաթիռ է ուղարկվել։

Քաղաքապետի խոսքով՝ երկու մարդ սրտի կանգի մեջ է եղել։

Ավտոբուսի առջևի հատվածը զգալիորեն վնասվել է։ Դեպքի հանգամանքները և տուժածների վիճակը ճշտվում են։