ԱՄՆ-ում հոկտեմբերին ստեղծվել է 165 հազար աշխատատեղ, սակայն գնաճը շարունակում է նվազեցնել գնողունակությունը

ԱՄՆ-ում հոկտեմբերին ստեղծվել է 165 հազար նոր աշխատատեղ, իսկ գործազրկության մակարդակը նվազել է՝ հասնելով 4.1 տոկոսի։ Աշխատատեղերի աճը զգալիորեն գերազանցել է տնտեսագետների կանխատեսումները, որոնք սպասում էին ընդամենը 65 հազար նոր աշխատատեղի։ Այդուհանդերձ, աշխատավարձերի աճը չի հասցնում գնաճին, ինչի հետևանքով միլիոնավոր ամերիկացիների գնողունակությունը շարունակում է նվազել․ գրում է Associated Press-ը։

Աշխատանքի նախարարության տվյալներով՝ օգոստոսի և սեպտեմբերի ցուցանիշները վերանայվել են դեպի վեր՝ այդ երկու ամիսների ընդհանուր ցուցանիշին ավելացնելով ևս 84 հազար աշխատատեղ։ Հոկտեմբերին միջին ժամային աշխատավարձը սեպտեմբերի համեմատ աճել է 0.4 տոկոսով՝ հունվարից ի վեր գրանցված ամենամեծ ամսական աճը։ Սակայն տարեկան կտրվածքով աշխատավարձերն աճել են ընդամենը 3.1 տոկոսով։

Աշխատատեղերի աճը կարող է ազդել Դաշնային պահուստային համակարգի հետագա որոշումների վրա։ Աշխատաշուկայի կայունությունը Կենտրոնական բանկին հնարավորություն է տալիս կենտրոնանալ գնաճի զսպման վրա։ CME FedWatch-ի տվյալներով՝ ներդրողները դեկտեմբերին հիմնական տոկոսադրույքի բարձրացման հավանականությունը գնահատում են 77 տոկոս։ Տնտեսագետների մի մասը չի բացառում նաև 2027 թվականի սկզբին ևս մեկ բարձրացում։

Հոկտեմբերին մասնագիտական և բիզնես ծառայությունների ոլորտում ստեղծվել է 70 հազար, առողջապահության ոլորտում՝ շուրջ 42 հազար, իսկ արտադրությունում՝ 19 հազար աշխատատեղ։ Միևնույն ժամանակ, հյուրանոցները, ռեստորաններն ու բարերը կրճատել են 10.6 հազար աշխատատեղ։

Չնայած դրական ցուցանիշներին՝ աշխատաշուկան շարունակում է մնալ համեմատաբար թույլ։ Այս տարվա ընթացքում գործատուները ամսական միջինում ստեղծել են 86 հազար աշխատատեղ։ Սա զգալիորեն ավելի քիչ է, քան 2023-2024 թվականներին գրանցված ամսական միջինը՝ 166 հազար աշխատատեղը։ Տնտեսագետները ստեղծված իրավիճակը բնութագրում են որպես «քիչ աշխատանքի ընդունելու և քիչ աշխատանքից ազատելու» միջավայր։

Ամերիկյան տնտեսությունը շարունակում է դիմակայել մի շարք ճնշումների՝ ներառյալ Թրամփի վարչակազմի մաքսատուրքերը և Իրանի հետ պատերազմը, որի հետևանքով բենզինի գները բարձրացել են մեկ գալոնի դիմաց 4 դոլարից ավելի։ Այդուհանդերձ, հուլիս-սեպտեմբեր ամիսներին երկրի ՀՆԱ-ն տարեկանացված հաշվարկով աճել է 3.4 տոկոսով՝ հիմնականում սպառողական ծախսերի և արհեստական բանականության ոլորտում ներդրումների հաշվին։

Միևնույն ժամանակ, արհեստական բանականության զարգացումը կարող է սահմանափակել նոր աշխատատեղերի ստեղծումը։ SharkNinja ընկերության գործադիր տնօրեն Մարկ Բարոկասի խոսքով՝ ընկերությունը հաջորդ տարի նախատեսում է աշխատանքի ընդունման աճի տեմպը նվազեցնել մինչև 5 տոկոս՝ նախորդ երկու տարիների 8-10 տոկոսի փոխարեն։ Ընկերությունը արհեստական բանականության գործիքներ է ներդրել արտադրանքի մշակման, մեդիա պլանավորման և ֆինանսների ոլորտներում՝ աշխատակիցներին ավելի բարդ խնդիրների վրա կենտրոնանալու հնարավորություն տալով։