ՀՅԴ Հայ դատը Սինիրլիօղլուին մեղադրում է Հայոց ցեղասպանության ժխտումը խթանելու մեջ

ՀՅԴ Հայ դատի կենտրոնական գրասենյակը ՄԱԿ-ի Անվտանգության խորհրդին կոչ է արել մերժել Ֆերիդուն Սինիրլիօղլուի թեկնածությունը՝ ՄԱԿ-ի գլխավոր քարտուղարի պաշտոնում։

Հայտարարության մեջ նշվում է, որ ՄԱԿ-ի գլխավոր քարտուղարը պետք է լինի կազմակերպության կանոնադրության անկողմնակալ պահապանը և աշխարհում զանգվածային ոճրագործությունների մասին բարձրաձայնող առաջնային պաշտոնյան։ Հայ դատի գրասենյակի գնահատմամբ՝ Սինիրլիօղլուի գործունեությունը հակասում է այդ սկզբունքներին, քանի որ տասնամյակներ շարունակ նա ՄԱԿ-ում շրջանառվող փաստաթղթերում առաջ է մղել Հայոց ցեղասպանության ժխտումը։

Հայտարարության մեջ անդրադարձ է կատարվել նաև 2026 թվականի հուլիսին տեղի ունեցած միջադեպին։ Ըստ Հայ դատի գրասենյակի՝ Սինիրլիօղլուն, որն այդ ժամանակ ԵԱՀԿ գլխավոր քարտուղարն էր, ռուսաստանցի փրանկերի հետ զրույցում, կարծելով, թե խոսում է ՀՀ վարչապետ Նիկոլ Փաշինյանի հետ, պատրաստակամություն էր հայտնել աջակցել Ամենայն հայոց կաթողիկոս Գարեգին Երկրորդի պաշտոնանկության հարցում։

Հայ դատի գրասենյակը նաև պնդում է, որ Սինիրլիօղլուն չի կարող ապահովել ՄԱԿ-ի գլխավոր քարտուղարի պաշտոնի համար անհրաժեշտ քաղաքական չեզոքությունը։ Նրան բնութագրելով որպես Թուրքիայի նախագահ Ռեջեփ Թայիփ Էրդողանի վստահված անձ՝ գրասենյակը հիշեցնում է ՄԱԿ-ի կանոնադրության 100-րդ հոդվածը, որն արգելում է գլխավոր քարտուղարին որևէ կառավարությունից կամ կազմակերպությունից դուրս իշխանությունից ցուցումներ խնդրել կամ ստանալ։