Ռոնալդուն փոխեց ֆուտբոլում պրոֆեսիոնալիզմի չափանիշները․ Ռիո Ֆերդինանդ

«Մանչեսթեր Յունայթեդի» նախկին պաշտպան Ռիո Ֆերդինանդը նշել է, թե որն է իր նախկին խաղընկեր Կրիշտիանու Ռոնալդուի կարիերայի ամենամեծ նվաճումը։ Նրա խոսքով՝ պորտուգալացու գլխավոր ձեռքբերումը ոչ թե խփած գոլերն ու նվաճած տիտղոսներն են, այլ ֆուտբոլում պրոֆեսիոնալիզմի չափանիշները փոխելը։

Ֆերդինանդը նշել է, որ Ռոնալդուն նոր նշաձող է սահմանել ֆիզիկական պատրաստվածության, մարզական երկարակեցության, առողջության նկատմամբ հոգատարության և մարզումներին նվիրվածության առումով։ Նա հիշել է, որ դեռ «Մանչեսթեր Յունայթեդում» հանդես գալու տարիներին Ռոնալդուն հաճախ մնում էր մարզումներից հետո՝ կատարելագործելու իր խաղային որակները, երբ մյուսներն արդեն ավարտել էին աշխատանքը։

Նախկին պաշտպանը Ռոնալդուին համարել է նաև Պորտուգալիայի պատմության մեծագույն ֆուտբոլիստը։ Նրա խոսքով՝ հարձակվողը փոխել է ազգային հավաքականի հոգեբանությունը և մի ամբողջ ազգի հավատ ներշնչել՝ սեփական թիմի հաջողությունների նկատմամբ։

Հիշեցնենք, որ նոյեմբերի 5-ին 41-ամյա Կրիշտիանու Ռոնալդուն հայտարարել է Պորտուգալիայի ազգային հավաքականում կարիերան ավարտելու մասին։ Ազգային թիմի կազմում նա անցկացրել է 234 հանդիպում, խփել 146 գոլ և կատարել 45 գոլային փոխանցում։ Ռոնալդուն տղամարդկանց ազգային հավաքականների պատմության լավագույն ռմբարկուն է և ամենաշատ հանդիպում անցկացրած ֆուտբոլիստը։ Նա Պորտուգալիայի հետ դարձել է Եվրոպայի չեմպիոն 2016 թվականին, ինչպես նաև երկու անգամ նվաճել Ազգերի լիգայի գավաթը։