Գերմանիայի կանցլերը որոշել է հանուն իր ծննդյան օրվա բաց թողնել Թուրքիայում կայանալիք COP31 կլիմայական գագաթնաժողովը

Գերմանիայի կանցլեր Ֆրիդրիխ Մերցը որոշել է բաց թողնել ՄԱԿ-ի COP31 կլիմայական գագաթնաժողովը, որը երկուշաբթի մեկնարկում է Թուրքիայի Անթալիա քաղաքում, հայտնում է DW-ն։

Համաժողովում Գերմանիայի նախարարների կաբինետի միակ ներկայացուցիչը կլինի շրջակա միջավայրի նախարար Կարստեն Շնայդերը։ Մերցն իր բացակայությունը բացատրել է այլ պարտավորություններով, սակայն այս որոշումը սուր քննադատության է արժանացել գերմանացի կլիմայական ակտիվիստների կողմից։

Գերմանիայի կլիմայական շարժման առաջատար ակտիվիստներից Լուիզա Նոյբաուերը հայտարարել է, որ գագաթնաժողովին մասնակցելուց կանցլերի հրաժարումը միջազգային հանրությանը հղում է «հնարավոր վատագույն ազդանշանը»։

«Սա Գերմանիային անվայել է և վիրավորանք է հատկապես աշխարհի այն երկրների համար, որոնք ծովի մակարդակի բարձրացման պատճառով արդեն իսկ կանգնած են գոյաբանական սպառնալիքի առջև», — ընդգծել է նա։

Լրատվամիջոցների հաղորդմամբ, չորեքշաբթի, երբ գագաթնաժողովը դեռ շարունակվելու է, Մերցը նախատեսում է նշել իր ծննդյան 71-ամյակը՝ կնոջ և դստեր հետ այցելելով իտալական ռեստորան։ Նոյբաուերը կլիմայական համաժողովից կանցլերի բացակայությունն անվանել է «Bella Italia բացակայություն»՝ բառախաղ անելով իտալական Bella Italia արտահայտության հետ։

Անթալիայում կայանալիք գագաթնաժողովին կմասնակցեն շուրջ 200 պետությունների ներկայացուցիչներ։ COP31 համաժողովը նվիրված է կլիմայի փոփոխության դեմ պայքարի միջազգային ջանքերին և ջերմոցային գազերի արտանետումների կրճատման հետագա միջոցառումների համաձայնեցմանը։