ՌԴ հարվածներից հետո Ուկրաինայում 600 հազար մարդ մնացել է առանց լույսի

Ռուսական զորքերը գիշերը զանգվածային հարվածներ են հասցրել Ուկրաինայի Դնեպրոպետրովսկի մարզի էներգետիկ ենթակառուցվածքներին, ինչի հետևանքով ավելի քան 600 հազար բնակիչ մնացել է առանց էլեկտրականության։

Ուկրաինական ԴՏԷԿ էներգետիկ ընկերության հաղորդմամբ՝ հարվածների հետևանքով վնասվել են տարածաշրջանի կարևոր էներգետիկ օբյեկտները։ Էլեկտրամատակարարումն ընդհատվել է Պավլոգրադի, Սամարի, Կամենսկի և Դնեպրի շրջաններում, ինչպես նաև Դնեպր քաղաքում։

Մարզային վարչակազմի ղեկավար Ալեքսանդր Գանժայի խոսքով՝ հիվանդանոցներն ու կենսական նշանակության ենթակառուցվածքներն անցել են գեներատորային սնուցման։

Ռուսական անօդաչու թռչող սարքերի հարվածների հետևանքով Խմելնիցկի քաղաքում վնասվել են նաև բնակելի շենքեր։ Արտակարգ ծառայությունների նախնական տվյալներով՝ մեկ մարդ տուժել է։

Ուկրաինայի ռազմաօդային ուժերի հաղորդմամբ՝ գիշերը Ռուսաստանն Ուկրաինայի ուղղությամբ արձակել է 164 անօդաչու թռչող սարք և երեք հրթիռ։ Ուկրաինական կողմի տվյալներով՝ հաջողվել է խոցել անօդաչուներից 137-ը։