Կրետե կղզու մոտ միգրանտներ տեղափոխող նավից 12 զոհվածի մարմին է հայտնաբերվել

Հունաստանի իշխանությունները նոյեմբերի 9-ի վաղ առավոտյան Կրետե կղզուց հարավ հայտնաբերված՝ միգրանտներ տեղափոխող նավից դուրս են բերել 12 զոհվածի մարմին։ Նույն նավից Մարոկկոյի դրոշի ներքո նավարկող բեռնատար նավը փրկել է 18 մարդու։ Այս մասին հայտնել է Հունաստանի առափնյա պահպանության ծառայությունը։

Նավը հայտնաբերվել է Կրետեի հարավային ափից շուրջ 28 կմ հեռավորության վրա։ Զոհվածների ինքնության և մահվան հանգամանքների վերաբերյալ առայժմ լրացուցիչ տեղեկություններ չեն հաղորդվում։

Կրետեից հարավ հայտնաբերվել են ևս երկու նավակներ, որոնցից մեկում եղել է շուրջ 47, մյուսում՝ մոտ 40 մարդ։ Դրանք նկատել են Եվրոպական միության սահմանային գործակալության՝ Frontex-ի օդանավն ու անօդաչու թռչող սարքը։ Երկու նավակներում գտնվող բոլոր մարդկանց հաջողվել է փրկել, նրանց տեղափոխում են Կրետեի հարավային ափի նավահանգիստ։

Հունաստանը շարունակում է մնալ Եվրոպական միություն հասնելու հիմնական ուղիներից մեկը Մերձավոր Արևելքից, Աֆրիկայից և Ասիայից հակամարտություններից ու աղքատությունից փախչող միգրանտների համար։ Վերջին ամիսներին հազարավոր մարդիկ Հյուսիսային Աֆրիկայից, հիմնականում՝ Լիբիայից, վտանգավոր ծովային ճանապարհով փորձում են հասնել Կրետե։