Ուկրաինան ընդունեց օտարերկրյա պաշտոնյաների կաշառակերության դեմ ուղղված օրինագիծ

Ուկրաինայի Գերագույն ռադան նոյեմբերի 10-ին ընդունել է օրինագիծ, որը խստացնում է միջազգային գործարար գործարքների շրջանակում օտարերկրյա պետական պաշտոնյաներին կաշառելու համար նախատեսված պատիժները։

Նախագահ Վլադիմիր Զելենսկու նախաձեռնած օրինագիծը միջազգային կոռուպցիայի դեմ պայքարի և Եվրամիությանն անդամակցելու ճանապարհին Ուկրաինայի ստանձնած պարտավորությունների կատարմանն ուղղված քայլերից է։

Օրինագծի ընդունումը անհրաժեշտ պայման է Տնտեսական համագործակցության և զարգացման կազմակերպության (ՏՀԶԿ)՝ միջազգային գործարար գործարքներում օտարերկրյա պաշտոնյաների կաշառակերության դեմ պայքարի կոնվենցիային Ուկրաինայի միանալու գործընթացն ավարտելու համար։ Կոնվենցիան նախատեսում է երկրների միջև համագործակցություն կոռուպցիոն հանցագործությունների բացահայտման և քննության գործում։

Ուկրաինայի նախագահի աշխատակազմի ղեկավար Կիրիլո Բուդանովի խոսքով՝ օրենքը թույլ կտա խստացնել միջազգային կոռուպցիայի համար պատասխանատվությունը, ամրապնդել գործընկերների վստահությունը և կատարել ԵՄ անդամակցության բանակցությունների շրջանակում ստանձնած պարտավորությունները։

Օրինագիծը վերաբերում է այն դեպքերին, երբ օտարերկրյա պետական պաշտոնյաներին կաշառք են առաջարկում կամ տալիս՝ միջազգային գործարքներում շահավետ պայմանագրեր կամ այլ անօրինական առավելություններ ստանալու նպատակով։

Խորհրդարանի իրավապահ հանձնաժողովի ղեկավար Սերգեյ Իոնուշասի խոսքով՝ օրենքը նախատեսում է կատարելագործել քրեական և քրեական դատավարության օրենսդրությունը, ամրապնդել պատասխանատվության մեխանիզմներն ու վերացնել օրենսդրական բացերը։