Ֆլորիդայում ջրհեղեղի պատճառով շիմպանզեին սնունդ են հասցրել դրոնով

ԱՄՆ Ֆլորիդա նահանգում տեղացած հորդառատ անձրևների և դրանց հետևանքով առաջացած ջրհեղեղների պատճառով շիմպանզեների ապաստարանի աշխատակիցները ստիպված են եղել սնունդն անօդաչու թռչող սարքի միջոցով հասցնել 38-ամյա մի շիմպանզեի։

«Save the Chimps» կազմակերպության՝ շուրջ 61 հեկտար տարածք զբաղեցնող ապաստարանում պահվում է մոտ 200 շիմպանզե։ 

Ֆլորիդայի հարավարևելյան և կենտրոնական շրջաններում անձրևները տեղացել են կիրակիից երեքշաբթի։ Կենդանիների խնամքն անխափան ապահովելու նպատակով կազմակերպության որոշ անասնաբույժներ և այլ աշխատակիցներ գիշերել են ապաստարանի տարածքում։

Ջրանցքների վարարումների հետևանքով ջրի տակ են անցել այն ճանապարհները, որոնցով, սովորաբար, գոլֆի մեքենաներով շիմպանզեների համար օրական շուրջ 1360 կգ սնունդ է տեղափոխվում։ Աշխատակիցները փորձել են օգտագործել նաև բարձր անցանելիությամբ հատուկ մեքենա, սակայն այն շուտով շարքից դուրս է եկել։

Այդ ընթացքում Քալեբ անունով 38-ամյա շիմպանզեն հայտնվել է ջրով շրջապատված տարածքում և կտրվել ապաստարանի մյուս հատվածներից։ Կազմակերպության աշխատակիցներն արտակարգ իրավիճակների համար նախապես ձեռք բերված առաքման դրոնի միջոցով Քալեբին սնունդ և ծածկոցներ են հասցրել։ Ավելի ուշ կենդանին ինքնուրույն տեղափոխվել է ավելի մատչելի տարածք։

Մյուս շիմպանզեներին սնունդ, դեղորայք և անհրաժեշտ պարագաներ հասցնելու համար աշխատակիցներն օգտագործել են բեռնատարներ, տրակտոր, ինչպես նաև սպասարկման աշխատակցի անձնական ավտոմեքենան։

Կազմակերպության ներկայացուցչի խոսքով՝ ջրհեղեղի հետևանքով ապաստարանի խոհանոցի մոտ հայտնվել է նաև փոքրիկ ալիգատոր։ Հավանաբար, ջրի բարձրացման պատճառով սողունը հասել է տարածք, որտեղ սովորաբար ալիգատորներ չեն հանդիպում։