ԱՄՆ-ում 2027-ին կավելանան ստանդարտ հարկային նվազեցումն ու երեխայի հարկային վարկը

ԱՄՆ ներքին եկամուտների ծառայությունը (IRS) հրապարակել է 2027 հարկային տարվա տարեկան գնաճային ճշգրտումները, որոնց համաձայն՝ կբարձրանան ստանդարտ հարկային նվազեցման և մի շարք հարկային արտոնությունների չափերը։ Նոր դրույքաչափերը կկիրառվեն 2028 թվականին ներկայացվող հարկային հայտարարագրերի նկատմամբ։ Այս մասին հայտնում է Associated Press-ը։

2027 թվականի համար միայնակ հարկ վճարողների ստանդարտ նվազեցումը 16,100 դոլարից կբարձրանա մինչև 16,600 դոլար։ Համատեղ հարկային հայտարարագիր ներկայացնող ամուսնական զույգերի համար այն կաճի 32,200-ից մինչև 33,200 դոլար, իսկ ընտանիքի ղեկավարի կարգավիճակով հայտարարագիր ներկայացնողների համար կկազմի 24,925 դոլար՝ ներկայիս 24,150 դոլարի փոխարեն։

Կբարձրանա նաև երեխաների հարկային վարկը։ Դրա առավելագույն չափը յուրաքանչյուր երեխայի համար 2,200 դոլարից կհասնի 2,300 դոլարի, իսկ վերադարձվող մասը կավելանա 100 դոլարով՝ հասնելով 1,800 դոլարի։

Կփոխվեն նաև վաստակած եկամտի հարկային վարկի չափերը։ Երեխա չունեցող աշխատողների համար առավելագույն վարկը 664 դոլարից կբարձրանա մինչև 685 դոլար։ Երկու երեխա ունեցող ընտանիքների համար այն կաճի 7,316-ից մինչև 7,552 դոլար։

AP-ի հաշվարկներով՝ 100 հազար դոլար տարեկան եկամուտ ունեցող ամուսնական զույգի դաշնային եկամտահարկը, ստանդարտ նվազեցումից օգտվելու դեպքում, 7,640 դոլարից կնվազի մինչև 7,504 դոլար։ Իսկ 60 հազար դոլար եկամուտ ունեցող միայնակ հարկ վճարողի հարկային պարտավորությունը 5,020 դոլարից կնվազի մինչև 4,952 դոլար։ Հաշվարկները կատարվել են՝ ենթադրելով, որ եկամուտը չի փոխվում։

Միաժամանակ, 2025 թվականին ընդունված հարկային օրենքով սահմանված մի շարք արտոնություններ գնաճի հաշվարկով չեն ավելացվի։ Աշխատողները կկարողանան հարկային պահումներ կատարել մինչև 25 հազար դոլարի թեյավճարների և մինչև 12,500 դոլարի արտաժամյա աշխատանքի վարձատրության համար։ Համատեղ հայտարարագիր ներկայացնող ամուսնական զույգերի համար արտաժամյա աշխատանքի վարձատրության պահման սահմանաչափը կկազմի 25 հազար դոլար։

65 տարեկան և բարձր անձինք նույնպես կկարողանան օգտվել լրացուցիչ 6,000 դոլարի հարկային նվազեցումից։ Այս արտոնությունները նախատեսված են գործելու մինչև 2028 հարկային տարվա ավարտը, եթե Կոնգրեսը չերկարաձգի դրանց գործողությունը։

Եկամտահարկի առավելագույն՝ 37 տոկոս դրույքաչափը կմնա անփոփոխ։ 2027 թվականին այն կկիրառվի 661,375 դոլարից ավելի եկամուտ ունեցող միայնակ հարկ վճարողների և 793,650 դոլարից ավելի եկամուտ ունեցող ամուսնական զույգերի նկատմամբ։