Շնաձկները վերադարձել են Հադերայի ափ․ Իսրայելում լողորդներին զգուշացնում են մահացու վտանգի մասին

Իսրայելի բնության և պարկերի վարչությունը կրկին զգուշացրել է Հադերայի ափերի մոտ հավաքվող շնաձկների մասին՝ հորդորելով մարդկանց չսուզվել և չզբաղվել սնորկելինգով այդ տարածքում։

Շնաձկները վերադառնում են Հադերա քաղաքի էլեկտրակայանի հարակից ջրեր՝ ամենամյա ձմեռային հավաքույթի համար։ Դրանք այստեղ կուտակվում են սովորաբար նոյեմբերից մայիս ընկած ժամանակահատվածում, իսկ խմբում կարող են լինել մի քանի տասնյակ առանձնյակներ։

Վարչությունը հիշեցրել է, որ այդ հատվածում լողալն արգելված է։ Էլեկտրակայանից արտանետվող տաք ջրի հետևանքով ծովում առաջանում են ուժեղ հոսանքներ և հորձանուտներ, որոնք լուրջ վտանգ են ներկայացնում մարդկանց համար։ Ռիսկ են պարունակում նաև ձկնորսական սարքավորումները, այդ թվում՝ ջրում մնացած կեռիկներն ու ձկնորսական թելերը։

Իշխանությունները նշել են, որ շնաձկները հանդիպում են ոչ միայն էլեկտրակայանի հարակից ջրերում, այլև Իսրայելի ափամերձ այլ հատվածներում։ Նրանց հետ հանդիպումները անկանխատեսելի են և չեն կարող վերահսկվել։ 2025 թվականի ապրիլին Հադերայի մոտակայքում շնաձկան հետ հանդիպումն ավարտվել էր մարդու մահով։

Իսրայելի ափերի մոտ հիմնականում հանդիպում են երկու տեսակ՝ մթնշաղային և ավազային շնաձկներ։ Առաջինները կարող են հասնել մինչև երեք մետր երկարության և 150 կիլոգրամ քաշի, իսկ ավազային շնաձկները սովորաբար ունենում են մինչև երկու մետր երկարություն և մոտ 70 կիլոգրամ քաշ։

Հետազոտությունների նախնական արդյունքները ցույց են տալիս, որ շնաձկները Հադերայի էլեկտրակայանի հարակից տաք ջրերն են գալիս՝ հանգստանալու և տաքանալու համար։ Մասնագետների կարծիքով՝ բարձր ջերմաստիճանը կարող է արագացնել նրանց օրգանիզմի մի շարք ֆիզիոլոգիական գործընթացներ, այդ թվում՝ մարսողությունն ու վերարտադրողական գործառույթները։

Իսրայելի բնության և պարկերի վարչության ծովային ստորաբաժանման ղեկավար Յիգալ Բեն Արին նշել է, որ Միջերկրական ծովում շնաձկների պոպուլյացիաները զգալիորեն նվազել են չափից ավելի ձկնորսության և պատահական որսի հետևանքով։ Նրա խոսքով՝ երբեմն ձկնորսական ցանցերում հայտնված շնաձկներին վերադարձնում են ծով արդեն սատկած վիճակում։

Շնաձկները Իսրայելում օրենքով պաշտպանված վայրի կենդանիներ են։ Նրանց վնասելը, հետապնդելը կամ կերակրելն արգելված է և կարող է հանգեցնել քրեական պատասխանատվության։ Մասնագետները շեշտում են, որ այս գիշատիչները կարևոր դեր ունեն ծովային էկոհամակարգի հավասարակշռությունը պահպանելու գործում։