Բրիտանացի կատակերգու Դեյվիդ Ուոլիամսը մեղադրվում է դեռահաս աղջիկների սեռական շահագործման մեջ

Բրիտանացի հայտնի կատակերգու և մանկական գրքերի հեղինակ Դեյվիդ Ուոլիամսը մեղադրվում է իր հանրային ճանաչումն ու ազդեցությունն օգտագործելու միջոցով դեռահաս աղջիկներին և երիտասարդ կանանց սեռական նպատակներով շահագործելու համար։ Մեղադրանքների մասին երեքշաբթի հայտնել են ITV News-ը և The Guardian-ը՝ համատեղ հետաքննության արդյունքում։

Լրատվամիջոցները զրուցել են մի քանի կանանց հետ, որոնք պատմել են Ուոլիամսի ենթադրյալ վարքագծի մասին։ Նրանցից մեկը պնդել է, որ 15 տարեկանում Լոնդոնում գտնվող նրա տանը ենթարկվել է սեռական ոտնձգության։ Մյուս կանայք հայտնել են, որ կատակերգուն իրենց հետապնդել է դեռահասության տարիներին։

55-ամյա Ուոլիամսը հերքում է մեղադրանքները։ Լրատվամիջոցներին ուղղված նամակում նա հայտարարել է, որ սեռական գիշատիչ չէ և օրենք չի խախտել։ Միևնույն ժամանակ, նա նշել է, որ ցնցված է այն հանգամանքից, որ տարիներ առաջ իր հետ շփված կանայք այժմ վիրավորանք կամ զայրույթ են արտահայտում իր նկատմամբ։

Ուոլիամսը փորձել է դատարանի միջոցով արգելել լրատվամիջոցներին հրապարակել իր անունը՝ պնդելով, որ մեղադրանքների հրապարակումը կարող է հանգեցնել ինքնասպանության։ Սակայն անցած շաբաթ դատավորը մերժել է այդ պահանջը, և նրա ինքնությունը պաշտպանող սահմանափակումը երկուշաբթի երեկոյան դադարել է գործել։

Գործի քննության ընթացքում լրատվամիջոցների փաստաբան Գևին Միլարը հայտնել է, որ հետաքննության շրջանակում զրուցել են ավելի քան 100 մարդու հետ։ Նրա խոսքով՝ հավաքված տեղեկությունները վկայում են, որ Ուոլիամսը տարիներ շարունակ օգտագործել է իր հայտնիությունն ու ազդեցությունը՝ երիտասարդ կանանց հետ կապ հաստատելու և նրանց նկատմամբ անպատշաճ վարք դրսևորելու կամ նման փորձեր կատարելու համար։ Դատարանի որոշման ամփոփագրում նշվում է, որ ենթադրյալ գործողություններից մի քանիսը, դրանց ապացուցման դեպքում, կարող են համարվել քրեական հանցագործություններ։

Մեղադրանքների հրապարակումից հետո մի շարք կազմակերպություններ հայտարարել են նրա հետ համագործակցությունը դադարեցնելու մասին։ BBC-ն հայտնել է, որ հեռացնում է Ուոլիամսի մասնակցությամբ որոշ հաղորդումներ, այդ թվում՝ «Փոքր Բրիտանիան», և վերանայում իր հարթակներում նրա հեղինակած կամ մասնակցությամբ ստեղծված բոլոր նյութերը։ Նրա գրական գործակալությունը՝ Independent Talent Group-ը, նույնպես դադարեցրել է համագործակցությունը։

Ուոլիամսի գրքի հիման վրա նկարահանվող «Մատը» ֆիլմի պրոդյուսերները հայտարարել են, որ հեռացրել են նրա էպիզոդիկ դերը։ Նա նաև չի մասնակցի ֆիլմի թողարկմանն ու գովազդային արշավին։ Մեծ Բրիտանիայի Sky դիստրիբյուտորը հայտնել է, որ դադարեցնում է ֆիլմի ցուցադրության հետ կապված գործընթացները։

Ուոլիամսը հայտնի է դարձել «Փոքր Բրիտանիա» կատակերգական հեռուստաշոուի շնորհիվ, ինչպես նաև մանկական գրքերի հեղինակ է։ Նրա կայքի տվյալներով՝ հրատարակվել է շուրջ 40 գիրք, որոնք ամբողջ աշխարհում վաճառվել են ավելի քան 60 միլիոն օրինակով։ Նա նաև տասը տարի եղել է «Britain's Got Talent» հեռուստաշոուի ժյուրիի անդամ՝ հրաժարական տալով 2022 թվականին՝ մասնակիցների մասին անհարգալից մեկնաբանությունների համար ներողություն խնդրելուց հետո։

Հիշեցնենք, որ դեռ անցյալ տարի HarperCollins հրատարակչությունը դադարեցրել էր Ուոլիամսի հետ համագործակցությունը՝ նրա ոչ պատշաճ վարքագծի վերաբերյալ մեղադրանքներից հետո։ Նոր հրապարակումների ֆոնին Լոնդոնի Մետրոպոլիտեն ոստիկանությունը կապ է հաստատել լրատվամիջոցների հետ՝ հնարավոր տուժածներին տեղեկացնելու համար, թե ինչպես կարող են հաղորդում ներկայացնել ենթադրյալ հանցագործությունների վերաբերյալ։

Դատավորը, մերժելով հրապարակումն արգելելու պահանջը, նշել է, որ Ուոլիամսն ունի երկարատև հոգեբուժական խոցելիություն, և մեղադրանքների հրապարակումը կարող է մեծացնել ինքնասպանության ռիսկը։ Միևնույն ժամանակ, դատարանը եզրակացրել է, որ ներկայացված ապացույցները չեն հաստատում, թե ինքնասպանությունն անխուսափելի է։ Ուոլիամսի դեմ ներկայացված մեղադրանքները դեռևս ապացուցված չեն։