FREYJA-ի մեկ հրթիռը կարժենա 1 մլն եվրոյից պակաս․ Ուկրաինան պատրաստվում է փորձարկումներին

Ուկրաինան մտադիր է այս ձմռանն անցկացնել նոր հակաբալիստիկ FREYJA համակարգի փորձարկումները, որը պետք է դառնա ամերիկյան Patriot հակաօդային պաշտպանության համակարգի ավելի մատչելի այլընտրանքը։ Այս մասին հայտարարել է Ուկրաինայի նախագահ Վոլոդիմիր Զելենսկին։

Նրա խոսքով՝ Ուկրաինան եվրոպական գործընկերների հետ աշխատում է ոչ միայն համակարգի փորձարկումների, այլև դրա զանգվածային արտադրության կազմակերպման ուղղությամբ։

Նախագիծը ղեկավարում է ուկրաինական Fire Point ընկերությունը, որը մշակում է FP-7.X որսացող հրթիռն ու արձակման կայանքը։ Եվրոպական գործընկերները տրամադրում են ռադարներ, ուղղորդման և կառավարման համակարգեր։

Նախագծի համաձայն՝ մեկ հրթիռի արժեքը նախատեսվում է 1 միլիոն եվրոյից պակաս, մինչդեռ Patriot համակարգի մեկ որսացող հրթիռի արժեքը գնահատվում է մոտ 4-6 միլիոն դոլար։ FREYJA-ի որսման նախատեսվող բարձրությունը 20-25 կիլոմետր է, իսկ արտադրական հզորությունը հեռանկարում կարող է հասնել տարեկան 2000 հրթիռի։

Նախագծին մասնակցում է 10 երկիր, այդ թվում՝ Ուկրաինան, Մեծ Բրիտանիան, Գերմանիան, Ֆրանսիան և Նորվեգիան։