85 տարեկանում մահացել է «Մայք Համմեր» սերիալի աստղ Սթեյսի Քիչը

85 տարեկան հասակում մահացել է ամերիկացի դերասան Սթեյսի Քիչը, որն առավել հայտնի էր «Մայք Համմեր» հեռուստասերիալում մասնավոր խուզարկուի դերակատարմամբ։ Նա մահացել է երեքշաբթի՝ նոյեմբերի 10-ին, Լեհաստանի Մագդալենկա քաղաքի իր տանը, գրում է apnews-ը։

Դերասանի կինը՝ Մալգոշա Տոմասի Քիչը, հայտնել է, որ նա մահացել է սրտի լուրջ հիվանդության և սրտային անբավարարության դեմ երկարատև պայքարից հետո։ 2017 թվականին Քիչը սրտի կաթված էր տարել նաև Չիկագոյում՝ բեմում ելույթի ժամանակ։

Չնայած հեռուստատեսությունում ունեցած մեծ հաջողությանը՝ Քիչը հայտնի էր նաև որպես Շեքսպիրի ստեղծագործությունների նշանավոր մեկնաբան։ Նա խաղացել է Համլետի, Ռիչարդ III-ի և Լիր արքայի դերերը, արժանացել «Թոնի» մրցանակի՝ Բրոդվեյի «Հնդկացիներ» ներկայացման մեջ Բուֆֆալո Բիլի դերակատարման համար, ինչպես նաև «Ոսկե գլոբուսի»՝ Էռնեստ Հեմինգուեյի կերպարը մարմնավորելու համար։

Նրա կինոդերերից են «Նեբրասկա», «Ամերիկյան պատմություն X», «Բորնի ժառանգությունը» և «Ջեյ Քելլի» ֆիլմերը։ Հեռուստատեսությունում նա նկարահանվել է նաև «Փախուստ բանտից» և «Կապույտ արյուն» սերիալներում։

Դերասանի կարիերան լուրջ հարված էր ստացել 1984 թվականին, երբ նա ձերբակալվել էր Լոնդոնի Հիթրոու օդանավակայանում՝ կոկաին մաքսանենգ ճանապարհով տեղափոխելու փորձի համար։ Քիչը դատապարտվել էր ինը ամսվա ազատազրկման, սակայն բանտում անցկացրել էր վեց ամիս։

Ազատ արձակվելուց հետո դերասանը շարունակել էր նկարահանվել և աշխատել նաև թմրանյութերից կախվածության դեմ պայքարի ուղղությամբ։ Նա իր փորձի մասին պատմել էր ուսանողների և վերականգնողական կենտրոնների այցելուների հետ հանդիպումների ընթացքում՝ զգուշացնելով կախվածության վտանգների մասին։

Քիչին ողջ են մնացել կինը՝ Մալգոշա Տոմասին, և երեխաները՝ Շենոնն ու Կարոլինան։