Սի Ծինփինը հայտարարել է, որ Թայվանի վերամիավորումը Չինաստանի հետ անխուսափելի է

Չինաստանի նախագահ Սի Ծինփինը հայտարարել է, որ Թայվանի վերամիավորումը Չինաստանի հետ պատմականորեն անխուսափելի է՝ ընդգծելով, որ «պատմության ընթացքը հնարավոր չէ կանգնեցնել»։ Ելույթ ունենալով հեղափոխական առաջնորդ Սուն Յաթսենի ծննդյան 160-ամյակին նվիրված միջոցառմանը՝ Սին վերամիավորումը բնութագրել է որպես Չինաստանի անփոփոխ պատմական առաքելություն, հայտնում է Reuters-ը։

Նա նշել է, որ Պեկինը պատրաստ է Թայվանի հետ երկխոսության՝ վերամիավորման հարցի շուրջ՝ «Մեկ Չինաստանի» սկզբունքի և 1992 թվականի կոնսենսուսի հիման վրա։ Չինաստանի իշխանությունները Թայվանը համարում են երկրի անբաժանելի մասը, մինչդեռ կղզին ունի սեփական կառավարություն և ինքնուրույն քաղաքական համակարգ։

Սի Ծինփինի հայտարարությունը հնչել է այն ժամանակ, երբ միջազգային ուշադրությունը կենտրոնացած է Ասիա-խաղաղօվկիանոսյան տարածաշրջանի անվտանգության և Չինաստանի արտաքին քաղաքականության վրա։ Թայվանի հարցը շարունակում է մնալ Պեկինի և Վաշինգտոնի հարաբերությունների առանցքային տարաձայնություններից մեկը։

Հայտարարության ժամանակը նույնպես ուշագրավ է․ այն հնչել է նոյեմբերի 18-19-ը Չինաստանի Շենժեն քաղաքում նախատեսված Ասիա-խաղաղօվկիանոսյան տնտեսական համագործակցության՝ ԱՏԷՀ-ի գագաթնաժողովից առաջ։ Միջոցառման շրջանակում քննարկվում է ԱՄՆ նախագահ Դոնալդ Թրամփի, Ռուսաստանի նախագահ Վլադիմիր Պուտինի և Սի Ծինփինի հնարավոր հանդիպման հարցը։