24 կարատանոց հազվագյուտ վարդագույն ադամանդը վաճառվել է ավելի քան 14,6 միլիոն դոլարով

Ժնևում կայացած Christie’s աճուրդում 24 կարատանոց հազվագյուտ վարդագույն ադամանդով մատանին վաճառվել է 12,1 միլիոն շվեյցարական ֆրանկով՝ ավելի քան 14,6 միլիոն դոլարով։ «Bulgari Pink» անվանումը կրող զարդի արժեքը նախապես գնահատվել էր 10-15 միլիոն ֆրանկ, հայտնում է Radar.am-ը։

Զմրուխտաձև ադամանդը համարվում է բացառիկ հազվագյուտ նմուշ։ Ըստ տեղեկությունների՝ այն ծագում է Հնդկաստանի հայտնի Գոլկոնդայի հանքերից, որոնք պատմականորեն հայտնի են բարձրորակ ադամանդներով։

Ադամանդը ձեռք էր բերվել 1950-ականներին և շուրջ յոթ տասնամյակ մնացել նույն ընտանիքի սեփականությունը։ Christie’s-ի ոսկերչական բաժնի ղեկավար Մաքս Ֆոսեթը վաճառքից առաջ այն բնութագրել էր որպես «վարդագույն ադամանդների Մոնա Լիզա»։

Աճուրդում ներկայացվել է նաև 20-րդ դարի զարդերի մասնավոր հավաքածու՝ շուրջ 300 նմուշով։ Դրանց թվում եղել են Bulgari, Cartier և Graff հայտնի ոսկերչական տների աշխատանքներ։

Ադամանդի վաճառքը կրկին ուշադրություն է հրավիրել հազվագյուտ գունավոր քարերի շուկայի վրա, որտեղ բացառիկ ծագում և պատմություն ունեցող զարդերը շարունակում են միլիոնավոր դոլարների արժեք ունենալ։