«Չարլզ» փոթորկի պատճառով Պորտուգալիան փակում է 8 հազար դպրոց

Պորտուգալիան չորեքշաբթի օրը փակել է երկրի բոլոր դպրոցներն ու ոչ էական հանրային ծառայությունները՝ «Չարլզ» ուժեղ փոթորկի պատճառով։ Իշխանությունները բնակիչներին կոչ են արել մնալ տանը՝ կանխատեսվող վտանգավոր եղանակային պայմանների պատճառով, սակայն փոթորիկն ի վերջո սպասվածից ավելի քիչ վնաս է պատճառել, հայտնում է Associated Press-ը։

Սա առաջին դեպքն է վերջին տասնամյակների ընթացքում, երբ Պորտուգալիայի շուրջ 8 հազար դպրոցները փոթորկի վտանգի պատճառով միաժամանակ դադարեցրել են դասերը։ Վատ եղանակի հետևանքով երկրի չորս միջազգային օդանավակայաններում չեղարկվել է ավելի քան 300 չվերթ։ Ազգային օդերևութաբանական գործակալության տվյալներով՝ որոշ շրջաններում քամու պոռթկումների արագությունը գերազանցել է ժամում 120 կիլոմետրը։

Մայրաքաղաք Լիսաբոնի փողոցները հիմնականում դատարկ են եղել, իսկ որոշ հատվածներ հեղեղվել են խցանված ջրահեռացման համակարգերի պատճառով։ Ավտոբուսները երթևեկել են առանց ուղևորների, սուպերմարկետների ազգային ցանցը փակել է խանութները, իսկ քաղաքում անցկացվող միջազգային տեխնոլոգիական համաժողովի՝ շուրջ 70 հազար մասնակից ունեցող միջոցառումների ծրագիրը չեղարկվել է այդ օրվա համար։

Այնուամենայնիվ, կեսօրվա դրությամբ արտակարգ իրավիճակի ամենաբարձր՝ կարմիր վտանգի մակարդակը պահպանվել է միայն երկրի հարավում գտնվող Ալգարվե շրջանում։ Ավելի վաղ այդ նախազգուշացումը տարածվում էր Պորտուգալիայի տարածքի կեսից ավելիի վրա։ «Չարլզ» փոթորիկը նախորդ օրը հարվածել էր նաև Մադեյրա կղզուն, որտեղ քամու արագությունը հասել էր ժամում 130 կիլոմետրի։

Վարչապետ Լուիս Մոնտենեգրոն գլխավորել է ճգնաժամային խմբի աշխատանքները, իսկ ներքին գործերի նախարար Լուիս Նևեսը հայտարարել է, որ կառավարության արձագանքը հիմնված է եղել եղանակային կանխատեսումների վրա։ Հունվարին «Քրիստին» փոթորկի հետևանքով պատճառված լայնածավալ վնասներից հետո իշխանությունները քննադատության էին ենթարկվել անբավարար նախապատրաստության համար։ Կանխատեսումների համաձայն՝ «Չարլզը» հետագայում պետք է հասներ նաև Իսպանիա, որտեղ վատ եղանակի պատճառով որոշ հարավային քաղաքներում հետաձգվել կամ չեղարկվել են համընդհանուր գործադուլի շրջանակում նախատեսված ցույցերը։