Ռուսաստանի կորուստները հատել են 1,6 միլիոնի սահմանը․ մեկ օրում՝ ևս 2 150 զինծառայող

Ուկրաինայի դեմ պատերազմի ընթացքում Ռուսաստանի բանակի մարդկային կորուստները գերազանցել են 1 միլիոն 616 հազարը։ Ուկրաինայի զինված ուժերի գլխավոր շտաբի նոյեմբերի 12-ի տվյալներով՝ 2022 թվականի փետրվարի 24-ից ի վեր ռուսական կողմը կորցրել է 1 616 330 զինծառայող։ Միայն վերջին մեկ օրում կորուստները կազմել են 2 150 մարդ։

Ուկրաինական կողմի հրապարակած տվյալների համաձայն՝ պատերազմի ընթացքում ռուսական բանակը կորցրել է նաև 12 471 տանկ, 25 720 զրահապատ մարտական մեքենա, 52 278 հրետանային համակարգ և 2 269 համազարկային կրակի ռեակտիվ համակարգ։

Բացի այդ, շարքից հանվել է 1 756 հակաօդային պաշտպանության համակարգ, 452 ինքնաթիռ, 356 ուղղաթիռ, 173 838 ավտոմեքենա և վառելիքի ցիստեռն, 3 130 անօդաչու ցամաքային մեքենա, 35 նավ ու նավակ և երկու սուզանավ։

Ուկրաինայի գլխավոր շտաբի տվյալներով՝ 2026 թվականի հոկտեմբերը Ռուսաստանի համար պատերազմի ամենամեծ մարդկային կորուստներով ամիսն է եղել՝ լայնածավալ ներխուժման մեկնարկից ի վեր։ Միևնույն ժամանակ, Կիևը սեփական ռազմական կորուստների ամբողջական թիվը չի հրապարակում՝ դա բացատրելով ռազմական գաղտնիքի պահպանման անհրաժեշտությամբ։

Անկախ արևմտյան վերլուծական կենտրոնների գնահատմամբ՝ ռուսական կորուստները զգալիորեն գերազանցում են ուկրաինականին։ Ռազմավարական և միջազգային հետազոտությունների կենտրոնը (CSIS) կորուստների հարաբերակցությունը գնահատում է մոտավորապես 2:1-ից 2,5:1։

Կենտրոնի 2026 թվականի հունվարի զեկույցի համաձայն՝ Ուկրաինան պատերազմի առաջին տարիներից մինչև 2025 թվականի դեկտեմբերը կարող էր ունենալ 500–600 հազար զոհ և վիրավոր, որոնցից 100–140 հազարը, ենթադրաբար, զոհվել են մարտերում։ Ուկրաինայի նախագահ Վլադիմիր Զելենսկին ավելի վաղ հայտարարել էր, որ մարտերում զոհվել է առնվազն 55 հազար ուկրաինացի զինծառայող։