Starshield-ը կապում է Ուկրաինայի ձեռքերը․ ռուսական ԱԹՍ-ները կրկին ճեղքում են պաշտպանությունը

Ուկրաինան կրկին բախվել է Starshield արբանյակային կապի համակարգի աշխատանքի արագության սահմանափակումների, որոնք լրջորեն խոչընդոտում են ռուսական անօդաչու թռչող սարքերի որսալու գործողություններին։ Այս մասին նոյեմբերի 12-ին հայտարարել է Ուկրաինայի նախագահ Վլադիմիր Զելենսկին։

Նրա խոսքով՝ սահմանափակումները մի քանի օր շարունակ խաթարում են ուկրաինական զինուժի աշխատանքը։ Starshield համակարգի արագությունը սահմանափակվել է ժամում մոտ 161 կիլոմետրով, ինչի հետևանքով ուկրաինական ուժերը դժվարանում են ժամանակին որսալ ռուսական ռեակտիվ անօդաչու թռչող սարքերը։

«Ցավոք, սա օգնում է ռուսներին ավելի շատ ուկրաինացիներ սպանել և ավելի ճշգրիտ հարվածներ հասցնել մեր երկրին»,– հայտարարել է Զելենսկին՝ հավելելով, որ սահմանափակումները պատահական տեխնիկական խափանումներ չեն, այլ համակարգված գործողություններ։

Դոնեցկի մարզում մարտնչող ուկրաինական ստորաբաժանման հրամանատարը, անանուն մնալու պայմանով, «Կիև Ինդեփենդենթին» հայտնել է, որ արագության սահմանափակումը շարունակում է գործել։ Նրա խոսքով՝ դա ռուսական ուժերին ավելի մեծ հնարավորություն է տալիս խուսափելու ուկրաինական անօդաչու որսորդներից կամ խոցելու դրանք։ Զարգացումը հաստատել է նաև Ուկրաինայի անօդաչու համակարգերի ուժերի ներկայացուցիչը։

Ուկրաինայի նախագահի խորհրդական Սերգեյ Բեսկրեստնովը ևս հաստատել է խնդիրը՝ նշելով, որ կապի խափանումներն ազդել են ինչպես «Շահեդ» տիպի անօդաչուներին հետևող ուղղաթիռների, այնպես էլ ռուսական ռեակտիվ ԱԹՍ-ները որսացող ուկրաինական համակարգերի աշխատանքի վրա։

Ուկրաինան այժմ փորձում է պարզել սահմանափակումների պատճառները ԱՄՆ-ի հետ քննարկումների միջոցով։ Starshield-ը, որը SpaceX-ի Starlink համակարգի ռազմականացված տարբերակն է, լայնորեն կիրառվում է ուկրաինական զինուժի կողմից։ SpaceX-ը հրապարակման պահին միջադեպի վերաբերյալ մեկնաբանություն չէր ներկայացրել։

Սա առաջին դեպքը չէ, երբ Ուկրաինան բախվում է նման խնդրի։ Հոկտեմբերի կեսերին ևս սահմանափակումներ էին մտցվել, որոնք, ըստ Զելենսկու, մինչև հոկտեմբերի 23-ը դժվարացրել էին ռուսական ռեակտիվ ԱԹՍ-ների որսալը։ Հոկտեմբերի վերջին ուկրաինական կողմը հայտնել էր, որ կապի արագությունը վերականգնվել է, սակայն այժմ սահմանափակումները կրկին վերադարձել են։