ԱՄՆ–ից արտաքսումները շատացել են. գրանցվել է բացարձակ ռեկորդ

ԱՄՆ ներգաղթի և մաքսային ոստիկանությունը (ICE) 2026 թվականի սեպտեմբերի 30-ին ավարտված ֆինանսական տարում արտաքսել է 483,2 հազար մարդու։ Սա գերատեսչության 23-ամյա պատմության ամենաբարձր ցուցանիշն է, հայտնում է Associated Press-ը՝ վկայակոչելով գերատեսչության տվյալները։

Արտաքսումների թիվն աճել է 9%-ով՝ նախորդ ռեկորդի համեմատ. մեկ տարի առաջ նույն ժամանակահատվածում արտաքսվել էր 442,64 հազար մարդ։ Ջո Բայդենի նախագահության վերջին՝ 2024 թվականի համեմատ ցուցանիշն աճել է 78%-ով. այն ժամանակ ԱՄՆ-ից արտաքսվել էր 271,48 հազար մարդ։

Վերջին 12 ամիսների ընթացքում ICE-ը նաև ձերբակալել է 474,85 հազար մարդու՝ գրեթե երկու անգամ ավելի, քան մեկ տարի առաջ, երբ ձերբակալվածների թիվը կազմել էր 239,89 հազար։ 2024 թվականին գերատեսչությունը ձերբակալել էր 113,43 հազար մարդ, այսինքն՝ երկու տարում ցուցանիշն աճել է ավելի քան չորս անգամ։

Դոնալդ Թրամփի՝ Սպիտակ տուն վերադառնալուց հետո ICE-ն այսքան մանրամասն տվյալներ չէր հրապարակել, դրանց թվում՝ 2025 թվականի համար։ Ընդ որում, ընթացիկ մամուլի հաղորդագրության մեջ չի նշվում, թե ձերբակալվածներից և արտաքսվածներից քանիսն են դատվածություն ունեցել։ Նման տեղեկություններ նախորդ վարչակազմերի օրոք հրապարակվում էին։

«Նախագահ Թրամփի առաջնորդության շնորհիվ ICE-ը հնարավորություն է ստացել անարգել հայտնաբերելու և արտաքսելու անօրինական ներգաղթյալներին՝ ամերիկացիների կյանքերը փրկելու համար»,– հայտարարել է ԱՄՆ ներքին անվտանգության նախարար Մարքուեյն Մալինը։

Սեպտեմբերին ICE-ը հայտնել է ավելի քան 48 հազար ձերբակալության մասին։ Դրանով ավարտվել է ռեկորդային ցուցանիշների երկամսյա շրջանը. օգոստոսին գերատեսչությունը ձերբակալել էր 50 հազար 925 մարդու։