Տագնապ ամերիկյան ավիաբազայում․ կասկածելի ԱԹՍ-ների մասին ահազանգ

Մեծ Բրիտանիայի Լեյքենհիթ ավիաբազայում, որտեղ տեղակայված են ամերիկյան ուժեր, անձնակազմին հրահանգել են պատսպարվել՝ տարածքի վերևում ենթադրյալ չարտոնված անօդաչու թռչող սարքերի մասին հաղորդումներից հետո։

ԱՄՆ ռազմաօդային ուժերը հաստատել են, որ անվտանգության ստորաբաժանումներն արձագանքել են ահազանգին։ Պաշտոնական տեղեկության համաձայն՝ անձնակազմը, ինքնաթիռներն ու ենթակառուցվածքները չեն տուժել։

Բրիտանական պաշտպանության նախարարությունը հայտնել է, որ իրավիճակը կարգավորվել է, իսկ ամերիկյան կողմի հետ շարունակվում է հանգամանքների պարզաբանումը։ Տեղացի պատգամավոր Նիք Թիմոթին ևս հայտարարել է, որ բնակչության համար վտանգ չկա։

Ահազանգը հնչել է բրիտանական տարածքում ամերիկյան ռազմակայանների անվտանգության նկատմամբ ուժեղացված ուշադրության պայմաններում։ Այս դեպքով ԱԹՍ-ների պատկանելության կամ հնարավոր կազմակերպիչների մասին հաստատված տեղեկություն չի ներկայացվել։