Շվեյցարիան կարող է թույլատրել զենքի արտահանումը 36 երկիր

Շվեյցարիայի իշխանությունները հույս ունեն, որ նոյեմբերի 29-ին կայանալիք հանրաքվեի ընթացքում կհաստատվեն ռազմական նյութերի մասին օրենքում խորհրդարանի կողմից ավելի վաղ ընդունված փոփոխությունները։ Դրանք նախատեսում են թույլատրել սպառազինության արտահանումը Համադաշնության գործընկեր 36 երկրներ, նույնիսկ եթե այդ երկրները մասնակցեն զինված հակամարտությունների։ Ներկայումս նման արտահանումն արգելված է Շվեյցարիայի չեզոքության քաղաքականության շրջանակում գործող օրենսդրությամբ։

Այս մասին տեղեկանում ենք Շվեյցարիայի տնտեսական հարցերի պետական քարտուղարության (SECO) պաշտոնական ներկայացուցիչ Ֆրանսուազ Շանցի՝ ՏԱՍՍ-ի հարցմանն ի պատասխան ներկայացրած պարզաբանումից։

Նրա խոսքով՝ խոսքը 36 երկրների խմբի մասին է, որոնք «ունեն արտահանման վերահսկողության համակարգեր, որոնք համարժեք են շվեյցարականին»։

Ներկայացուցիչը շեշտել է, որ նախատեսվում է թույլատրել այնպիսի ռազմական նշանակության ապրանքների արտահանումը, որոնք տվյալ հակամարտությունում համապատասխան կողմին ռազմական առավելություն չեն տալիս։

Գերատեսչությունում փոփոխությունների անհրաժեշտությունը բացատրել են նրանով, որ ներկայիս տեսքով ռազմական նյութերի մասին օրենքը «դուրս է գալիս չեզոքության մասին օրենքի պահանջների շրջանակից»։

«Վերանայումը օրենքը վերադարձնում է այդ շրջանակներին․ այն չի նվազեցնում չեզոքության մասին օրենքով սահմանված չափանիշները, այլ թողնում է դրանք անփոփոխ», — պարզաբանել է Շանցը։