Մարտիրոսյանը հաղթեց Կարլսենին․ հայ գրոսմայստերը՝ խմբի առաջատար

Հայ գրոսմայստեր Հայկ Մարտիրոսյանը կարևոր հաղթանակ է տարել աշխարհի հնգակի չեմպիոն Մագնուս Կարլսենի նկատմամբ։ Բուդապեշտում անցկացվող Total Chess World Championship Tour Pilot մրցաշարի երրորդ տուրում նա սպիտակ խաղաքարերով հաղթել է նորվեգացուն, իսկ երկրորդ պարտիայում՝ սևերով, հասել ոչ-ոքիի։

Երկու պարտիաներից Մարտիրոսյանը վաստակել է 4 միավոր։ Մրցաշարում հաղթանակի համար տրվում է 3, իսկ ոչ-ոքիի համար՝ 1 միավոր։

Այս արդյունքից հետո հայ շախմատիստը 10 միավորով միանձնյա գլխավորում է C խմբի մրցաշարային աղյուսակը՝ Անիշ Գիրիին գերազանցելով մեկ միավորով։ Նոյեմբերի 14-ին Մարտիրոսյանի հաջորդ մրցակիցը Յան Նեպոմնյաշչին է։