ԱՄՆ-ի պետքարտուղարությունը հերքում է Քերիի` Դամասկոս այցելելու մասին լուրերը

ԱՄՆ-ի պետքարտուղարության պաշտոնական ներկայացուցիչ Վիկտորիա Նուլանդը ոչ խելամիտ է անվանել եվրոպական ԶԼՄ-ներում տարածված լուրերն այն մասին, թե պետքարտուղար Ջոն Քերին պատրաստվում է այցելել Դամասկոս:

«Թո՛ւյլ տվեք կարծիք հայտնել այդ խելագար շշուկների մասին: Պետքարտուղարը ոչ մի մտադրություն չունի այցելել Դամասկոս ոչ իր առաջին պաշտոնական շրջագայության շրջանակներում և ոչ էլ երբևէ այնքան ժամանակ, մինչև սիրիացի ժողովրդին ճանապարհ չբացվի իրագործելու ազատ ժողովրդավարական պետություն ստեղծելու իր ցանկությունները»,-հայտարարել է նա ճեպազրույցի ժամանակ: