Չելյաբինսկի երկնաքարի պայթյունը 20 անգամ հզոր էր Հերոսիմայի պայթյունից. NASA

NASA-ի գիտնականները հայտարարել են, որ նախօրեին Չելյաբինսկի վրա ընկած երկնաքարը մթնոլորտ ներխուժելու պահին առաջացրել է այնպիսի հզոր պայթյուն, որի հզորությունը կազմել է 300 կիլոտոննա, ինչը 20 անգամ ավել է Հերոսիմայի վրա իրականացված պայթյունի հզորությունից:

NASA օդատիեզերական գործակալության մասնագետներն արդեն պարզել են, որ երկնային մարմինը ներխուժել է մթնոլորտ 18 կմ/վրկ արագությամբ և պայթել է Երկիր մոլորակից 19-24 կմ-ի վրա: Երկնաքարի շառավիղը եղել է 15 մետր, իսկ կշիռը կազմել է 7 հազար տոննա:
1908թ. տունգուսյան երկնաքարի աղետից հետո սա Երկրի վրա հայտնված խոշորագույն երկնաքարն է:

Նշենք, որ 1908-ի ամռանը Պոդկամեննոյ Տունգուսկայի շրջանում տեղի ունեցած անսովոր երևույթի մասին գրեց աշխարհի ողջ մամուլը։ Այդ օրվանից մի ամբողջ հարյուրամյակ է անցել, բայց զարմանահրաշ դեպքի հանդեպ հետաքրքրությունը չի մարում։

Դա տեղի ունեցավ հունիսի 30-ին՝ առավոտյան ժամը 7-ին։ Տեղաբնակները մոտ 30 վայրկյան հնարավորություն ունեցան դիտելու վառ ու շլացուցիչ երկնաքարի անկումը, որը երկնքում հարավ-արևելքից հյուսիս-արևմուտք էր տեղափոխվում։ Աստղաքարը կարելի էր դիտել 800 կմ հեռավորությունից։ Այն իր ետևից հզոր փոշու հետք էր թողում, որը պահպանվեց մի քանի ժամ։

Լուսային երևույթներին հաջորդեց հզորագույն պայթյունը, որը լսվեց 100-ավոր կիլոմետրերի վրա։ Շատ բնակավայրերում հողը ցնցվում էր, քանդվում էին շինությունները, փշրվում էին պատուհանների ապակիները, պահարաններից ընկնում էին կենցաղային իրերը։ Մարդիկ և կենդանիները ցած էին ընկնում պայթյունի ալիքից։ Իրկուտսկի և Արևմտյան Եվրոպայի սեյսմոգրաֆները սեյսմիկ հզոր ալիք գրանցեցին։