Չորրորդ ինքնիշխանություն. «Ձերբակալվել են մի գործով երկու զինծառայող, մյուսով՝ մեկ»

«Երեկ ՀՀ Պաշտպանության նախարարությունը հանդես է եկել նոր հաղորդագրությամբ: Համաձայն դրա՝ ԼՂՀ N զորամասի ժամկետային զինծառայող, շարքային Ժորա Մկրտիչի Մկրտչյանին սուր փսիխոզ ախտորոշմամբ Երևանի կայազորի զինվորական հոսպիտալի հոգեբուժական բաժանմունք տեղափոխելու փաստի առթիվ հարուցված քրեական գործով երեկ որպես կասկածյալներ ձերբակալվել են նաև նույն զորամասի ժամկետային զինծառայողներ՝ սերժանտ Վաչիկ Գաբրիելի Գրիգորյանը՝ ՀՀ քրեական օրենսգրքի 360 հոդվածի 2-րդ մասով (զինծառայողին վիրավորանք հասցնելը, որը կատարվել է ստորադրյալի կողմից պետի, ինչպես նաև պետի կողմից ստորադրյալի նկատմամբ զինվորական ծառայության պարտականությունները կատարելու կապակցությամբ) և շարքային Մովսես Աշոտի Բադալյանը՝ ՀՀ քրեկական օրենսգրքի 359 հոդվածի 1-ին մասով (զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով):

Քրեկան գործի նախաքննությունը շարունակվում է:

Բացի այս, հոկտեմբերի 9-ին ԼՂՀ N զորամասի ժամկետային զինծառայող, եֆրեյտոր Վլադիմիր Անդրանիկի Ասատրյանի մահվան փաստի առթիվ հարուցված քրեական գործով երեկ ՀՀ քրեկան օրենսգրքի 360 հոդվածի 1-ին մասով (զինծառայողին վիրավորանք հասցնելը՝ զինվորական ծառայության պարտականությունները կատարելու կապակցությամբ զինծառայողի պատիվն ու արժանապատվությունը անպարկեշտ ձևով ստորացնելը մեկ այլ զինծառայողի կողմից) նախատեսված հանցագործության կասկածանքով ձերբակալվել է նույն զորամասի ժամկետային զինծառայող, շարքային Արմեն Մարտինի Զաքարյանը: Այս մասին iLur.am-ին հայտնել է Պաշտպանության նախարարության վարչության հասարակության հետ կապերի սպա Մերի Սարգսյանը: Կայքի լրագրողը խնդրել է մանրամասներ հաղորդել դեպքի առնչությամբ, սակայն ՊՆ-ից մերժել են այլ տեղեկություններ տրամադրել՝ ասելով, որ քրեկան գործի նախաքննությունը դեռ նոր է սկսվել և մինչև ավարտին չհասցվի, ՊՆ-ն մեկնաբանություններ չի տա»,- գրում է թերթը: