Այսօր կվերաբացվի Թուրքիայի Դիարբեքիրի Սբ. Կիրակոս եկեղեցին

Այսօրվանից Թուրքիայի Դիարբեքիրի Սուրբ Կիրակոս եկեղեցին կսկսի գործել` հավատացյալների համար: Թուրքիայի հայ համայնքի և Դիարբեքիրի քաղաքապետ Օսման Բայդեմիրի ջանքերով այսօր Մերձավոր Արևելքում ամենամեծ, սակայն, 30 տարի առանց աղոթք ասող հայերի մնացած եկեղեցին այսօր կվերաբացվի` գմբեթին կրելով խաչ` որպես գործող եկեղեցի:

16-րդ դարում կառուցված Դիարբեքիրի Սուրբ Կիրակոս եկեղեցին 1980-ից հետո թողնվել էր բախտի քմահաճույքին։ 1913 թ-ին եկեղեցու զանգակատունը փլվել էր կայծակի հարվածից, որից հետո նորն էր կառուցվել: Սակայն, 1915 թ-ին զանգակատունը կրկին ավերվել էր` այս անգամ թուրքական թնդանոթի հարվածից: Պատճառը` զանգակատան ավելի բարձր լինելն էր շրջակայքի մզկիթների մինարեթներից:

Այս տարի Ստամբուլում ապրող դիարբեքիրցի հայերը եկեղեցին վերանորոգելու խնդրանքով դիմել էին Թուրքիայի մշակույթի և տուրիզմի նախարարությանը, սակայն նրանց պատասխանել էին, թե իրենց կողմից վերանորոգման դեպքում այն կծառայի որպես թանգարան։ Դրանից հետո դիարբեքիրցի հայերը ստեղծում են «Սուրբ Կիրակոս հիմնադրամը»՝ եկեղեցին սեփական ուժերով վերանորոգելու համար։

Քաղաքապետ Օսման Բայդեմիրը դեռ այն ժամանակ խոստացել էր, որ ի տարբերություն վերջերս վերականգնված Ախթամարի Սուրբ Խաչ եկեղեցու, Սուրբ Կիրակոսը լինելու է լիարժեք կրոնական հաստատություն և գմբեթին խաչ է կրելու. «Եթե մզկիթը մինարեթ չունի, այն չի կարող մզկիթ համարվել: Նույն կերպ էլ եկեղեցին չի կարող ամբողջական համարվել` առանց խաչի: Հետևաբար, Սուրբ Կիրակոսն անխոս խաչ ունենալու է»: