Բաշար Ասադը հայտնել է Սիրիայից հեռանալու իր պայմանները

Սիրիայի նախագահ Բաշար Ասադը հայտնել է այն պայմանը, որի կատարման դեպքում միայն ինքը պատրաստ կլինի անհապաղ լքել երկրի նախագահի պաշտոնը: Նրա խոսքերով՝ ինքը զբաղեցնում է Սիրիայի նախագահի պաշտոնը ոչ թե անձնական շահերից ելնելով, այլ հանուն իր ժողովրդի:

Իշխանությունը թողնելու իր պատրաստակամության մասին Բաշար Ասադը հարցազրույց է տվել թուրքական «Ջումհուրիյեթ»-ին:
Ասադը հավելել է, որ ԱՄՆ-ին համարում է թշնամական պետություն, ուստի ուշադրություն չի դարձնում իշխանությունը լքելու մասին Վաշինգտոնի պահանջներին:

«Եթե իմ հեռանալը ապահովեր իմ ժողովրդի և երկրի փրկությունը, ես անգամ մի օր չէի մնա իշխանության ղեկին»,-ասել է նախագահը՝ պատասխանելով իշխանությունը լքելու պայմանների շուրջ լրագրողի հարցին:

Ասադը նշել է, որ իր հեռանալու մասին որոշումը պետք է կայացնի բացառապես Սիրիայի ժողովուրդը, նշելով, որ չի հանդուրժի իր երկրի գործերին արտաքին որևէ միջամտություն: