Յասիր Արաֆատի արտաշիրիմման արդյունքերը դեռևս պատրաստ չեն. Պաղեստինի նախագահ

Ինչպես տեղեկացնում է РИА Новости գործակալությունը, Պաղեստինի նախագահ Մահմուդ Աբասը լրագրողներին հայտարարել է, որ Պաղեստինի հանգուցյալ առաջնորդ Յասիր Արաֆատի ոսկրային հյուսվածքների նմուշների փորձաքննության արդյունքները դեռևս պատրաստ չեն:

«Մենք դիմել ենք 3 պետության, և նրանց մասնագետները առանձին և անկախ են աշխատում: Հենց որ պատրաստ լինեն փորձաքննության արդյունքերը, մեզ իմաց կտան»,-շաբաթ օրը լրագրողներին հայտարարել է Աբասը:

Հիշեցնենք, որ Յասիր Արաֆատի այրու պահանջով՝ Ֆրանսիայից, Ռուսաստանից և Շվեյցարիայից ժամանած մասնագետները արտաշիրիմման էին ենթարկել նրա դին՝ ուսումնասիրելու համար:

Արաֆատը վախճանվել էր 2004-ին Փարիզի հիվանդանոցներից մեկում կաթվածի հետևանքով: Մի քանի տարի անց ֆրանսիական դատախազությունը սկսել է հետաքննություն, որի նպատակն է պարզել, թե կարող էին արդյոք Արաֆատին թունավորել պոլոնիումով:

Յասիր Արաֆատը գլխավորում էր «Պաղեստինի ազատագրության կազմակերպությունը» և 1996թ. դարձել է Պաղեստինյան ինքնավարության առաջին քարտուղարը:

Յասիր Արաֆատի մահը կասկածի մշուշով է պատված: 2004-ին նա մահացել էր Փարիզում, որից հետո նրա մահվան շուրջ ամենատարբեր վարկածներ էին շրջանառվում: Մի մասը կարծում է, թե նրան թունավորել են իսրայելցի լրտեսները, մյուսները պնդում են, թե նրա մոտ ՁԻԱՀ էր հայտնաբերվել:

2005թ. The New York Times-ը բժշկական վկայություն հրապարակեց, որում ասված էր, թե Արաֆատը մահացել է ուղեղի արնազեղումից:
Այնուամենայնիվ, այս օգոստոսին ֆրանսիական դատախազությունը հայտարարել էր նոր հետաքննության անցկացման մասին այն բանից հետո, երբ Ալ Արաբիա հեռուստաընկերությունը Լոզանի ինստիտուտի աշխատակիցների միջոցով Արաֆատի հագուստների և անձնական իրերի վրա պոլոնիումի զգալի հետքեր էր հայտնաբերել: