Սիրիան բախվում է զինված ահաբեկչական խմբավորումների հետ

ՍԱՀ ԱԳ նախարար Վալիդ Ալ-Մուալեմը ռուսաստանյան ԶԼՄ-ների ներկայացուցիչների հետ հանդիպման ընթացքում վերահաստատել է, որ Սիրիան բախվում է զինված ահաբեկչական խմբավորումների գործունեության հետ, որոնք ձգտում են ապակայունացնել իրավիճակը երկրում, և որ նշված խմբավորումները ֆինանսավորվում և աջակցություն են ստանում արևմտյան և որոշ հարևան պետությունների կողմից: Այս մասին հաղորդում է սիրիական «SANA» լրատվական գործակալությունը:

Նշենք, որ օրեր առաջ զենքի մատակարարման և զինված խմբավորումներին աջակցելու գործում արևմտյան պետություններին և Թուրքիային մեղադրել էր նաև տեղեկատվական հարցերով Սիրիայի նախագահի խորհրդական Բուսեյնա Շաաբանը:
Ալ-Մուալեմը ռուսական պատվիրակության անդամներին տեղեկացրել է նաև, որ սիրիական անվտանգության ուժերի կողմից առգրավվել են ահաբեկիչների համար նախատեսաված զենքի և զինամթերքի խոշոր խմբաքանակներ: Սիրիայի արտաքին գործերի նախարարը խոսել է նաև Բաշար Ալ-Ասադի կողմից նախաձեռնված և երկրում իրականացվող բարեփոխումների գործընթացի մասին, ինչպես նաև Սիրիայի և սիրիացի ժողովրդի անունից երախտիքի խոսք հայտնել Ռուսաստանի կառավարությանը`ՄԱԿ-ի ԱԽ-ում Դամասկոսին ցուցաբերած աջակցության համար:

Հիշեցնենք, որ ներքաղաքական ճգնաժամը Սիրիայում սկիզբ է առել մարտի կեսերին: Հակակառավարական ելույթների մասնակիցների և անվտանգության ուժերի միջև տեղի ունեցած բախումների հետևանքով զոհվել է շուրջ 3000 մարդ: Մինչդեռ սիրիական իշխանությունները հաղորդում են ընդամենը 1500 զոհի մասին: