Ֆրանսիան դատապարտում է Սիրիայի կողմից Լիբանանի վրա կատարած հրթիռային ռմբակոծությունը

Ֆրանսիան վճռականորեն դատապարտում է Սիրիայի ռազմա-օդային ուժերի կողմից Լիբանանի ուղղությամբ կատարած հրթիռային ռմբակոծությունը. ասված է երկուշաբթի օրը Ֆրանսիայի ԱԳՆ-ի պաշտոնական ներկայացուցիչ Ֆիլիպ Լալյոյի տարածած հայտարարության մեջ. փոխանցում է РИА Новости-ն:

Նշենք, որ երկուշաբթի օրը Սիրիայի ռազմա-օդային ուժերն առաջին անգամ հրթիռային հարձակում իրականացրին հարևան Լիբանանի ուղղությամբ: Ռմբակոծության ենթարկվեցին սահմանակից Հիրբա Յութին և Վադի ալ Խեյլ շրջանները: Զոհերի և ավերածությունների մասին տեղեկություններ չի հաղորդվում:

Նախորդ ուրբաթ օրը Սիրիայի ԱԳՆ-ն լիբանանյան կառավարությանը հղված ուղերձ էր հրապարակել, որում զգուշացնում էր սիրիական բանակի կողմից Լիբանանի տարածքում գտնվող բազաներում ապաստանած գրոհայինների ուղղությամբ հարձակում նախապատրաստելու մասին, եթե Լիբանանի բանակը միջոցներ չձեռնարկի ընդհանուր լիբանանա-սիրիական սահմանի պաշտպանության համար, որի միջոցով Սիրիա են ներթափանցում զինված գրոհայինները: