Կրկին ահաբեկչություն Թուրքիայում. Ստամբուլում պայթյուն է որոտացել

Ինչպես գրում է թուրքական Yeni Şafak պարբերականը՝ վկայակոչելով թուրքական ոստիկանությանը, այսօր առավոտյան Ստամբուլում պայթյուն է որոտացել: Պայթյունը որոտացել է Քարթալ շրջանի կենտրոնական գրադարանի մուտքի մոտ:

Նախնական տվյալներով՝ զոհեր և վիրավորներ չկան: Տարվում է հետաքննություն:

Հիշեցնենք, որ չորեքշաբթի գիշերը Թուրքիայի մայրաքաղաք Անկարայում 2 ահաբեկչություն էր տեղի ունեցել: Ահաբեկիչների թիրախն են դարձել արդարադատության նախարարությունն ու իշխող «Արդարություն և զարգացում» կուսակցության կենտրոնական գրասենյակը:

Ինչպես հայտնում է CNN Turk-ը, նախարարության շենքի մուտքի մոտ նռնակ է պայթել, իսկ կուսակցության գրասենյակի ուղղությամբ կրակահերթ են արձակել: Վիրավորվել է 1 մարդ, պատճառվել է հսկայական նյութական վնաս:

Տեղական ԶԼՄ-ներն իրենց ուշադրությունն են հրավիրում այն հանգամանքի վրա, որ ահաբեկչությունը կազմակերպվել է հինգշաբթի օրը նշվող քրդական նոր տարվա նախաշեմին:

Ակնկալվում է, որ ազատազրկման մեջ գտնվող, արգելված «Քրդական աշխատավորական կուսակցության» առաջնորդ Աբդուլլահ Օջալանը հանդես է գալու զինադադարի և ծայրահեղական քուրդ գրոհայիններին Թուրքիայի տարածքը լքելու կոչով: Քուրդ ծայրահեղականները փորձում են խոչընդոտել «Քրդական աշխատավորական կուսակցության» և թուրքական կառավարության միջև խաղաղության հաստատմանը: