Ահաբեկչությունը մզկիթում ցնցել է ողջ Դամասկոսը

Ականավոր մուսուլման աստվածաբան Դամասկոսի Օմայան մզկիթի իմամ, շեյխ Մուհամմեդ Սաիդ ալ Բուտի սպանությունը երկրում մեծ դժգոհության ալիք է առաջ բերել:

Ինչպես տեղեկացնում է Սուրիա հեռուստաընկերությունը, երկրի տարբեր համայնքների հոգևորականության ներկայացուցիչները քննադատել են ահաբեկիչների գործողությունները, ովքեր վրեժխնդիր են եղել 84-ամյա աստվածաբանի հետ, ով իսլամական աշխարհում հայտնի էր որպես ականավոր քարոզիչ և Ղուրանի գիտակ: Ուրբաթ և շաբաթ օրերին Սիրիայում պաշտոնապես սուգ է հայտարարվել:

Ալ Բուտի կյանքն ընդհատվել էր Դամասկոսի կենտրոնում գտնվող Ալ Իման մզկիթի պայթյունի հետևանքով, ուր ներթափանցել էր մահապարտ-ահաբեկիչը: Ավանդաբար իմամը հինգշաբթի օրը աղոթասրահում ընդունում էր իր աշակերտներին, և սրահը մաևրդաշատ էր:

Վերջին տեղեկությունների համաձայն` իմամից բացի զոհվել է նաև 41 մարդ, իսկ 84 հոգի էլ վիրավորվել է: Նրանց թվում է նաև իմամ Ալ Բուտիի թոռը:

Շեյխը քննադատում էր կրոնական ծայրահեղականության դրսևորումը տարբեր խմբավորումների կողմից և կոչ էր անում Սիրիայում դադարեցնել բռնությունը: