Իսրայելի վարչապետը ներողություն է խնդրել Էրդողանից. ՄԱԿ-ը և Թուրքիան ողջունում են դա

Իսրայելի վարչապետ Բենիամին Նեթանյահուն ներողություն է խնդրել իր թուրք գործընկերոջից 2010-ին Գազայի հատվածին օգնություն մատակարարող թուրքական նավի վրա կատարած հարձակման ժամանած սպանված թուրք քաղաքացիների մահվան համար: Ներողությունը կազմակերպվել էր ԱՄՆ-ի նախագահ Բարաք Օբամայի կողմից, ով պաշտոնական այցով ժամանել էր Իսրայել:

Վարչապետ Նեթանյահուն ներողություն է խնդրել Թուրքիայի վարչապետ Ռեջեփ Թայիփ Էրդողանից այն սխալների համար, որոնք հանգեցրին 9 թուրք ակտիվիստների մահվանը. ասված է Իսրայելի վաչապետի աշխատակազմի տարածած հայտարարության մեջ. փոխանցում է Deutsche-Welle-ն:

Մարտի 22-ին Նեթանյահուն Օբամայի միջնորդությամբ հեռախոսային խոսակցություն էր ունեցել իր թուրք գործընկերոջ հետ:

Թուրքիայի խորհրդարանի խոսնակ Ջեմիլ Չիչեկն այդ արարքը գնահատել է որպես չափազանց կարևոր գործոն, նշելով, որ Թուրքիան ողջունում է այդ քայլը:

Իր հերթին՝ ՄԱԿ-ի գլխավոր քարտուղար Բան Կի Մունը ողջունել է այդ ընդառաջ քայլը և նշել, որ Իսրայելի ներողությունը կարևոր քայլ է տարածաշրջանում կայունության հաստատման և իսրայելա-թուրքական հարաբերությունների ամրապնդման համար: