Արաբական պետությունների լիգան պաշտոնապես կզինի Սիրիայի ընդդիմությանը

Արաբական պետությունների լիգան երեքշաբթի երեկոյան պաշտոնապես հայտարարել է այդ կազմակերպության անդամներին Սիրիայի ընդդիմությանը զենք մատակարարելու թույլտվության մասին:

Մարտի 24-ին Քաթարի մայրաքաղաք Դոհայում ընթացող Արաբական պետությունների լիգայի գագաթնաժողովի մեկ այլ կարևոր որոշում էր Լիգայում պաշտոնական Դամասկոսի տեղը հանձնել Սիրիայի ընդդիմադիր և հեղափոխական ուժերի ազգային կոալիցիային: Սիրիայի տեղը Լիգայում թափուր էր դեռևս 2011թ. նոյեմբերից, երբ Արաբական պետությունների լիգան վռնդեց Սիրիային այդ կազմակերպությունից՝ ընդհուպ մինչև երկրում ընտրությունների անցկացում և նոր կառավարության ձևավորում:

Նույնիսկ սիրիական ընդդիմության ներկայացուցիչները խոստովանում են, որ ընդունված որոշումները հակասում են Արաբական պետությունների լիգայի կանոնադրությանը, սակայն նրանց խոսքերով՝ իրավիճակը արտակարգ է և պահանջում է արտակարգ լուծումներ:
Արաբական պետությունների լիգային կանոնադրության 8-րդ հոդվածը պարտադրում է բոլոր անդամ պետություններին ձեռնպահ մնալ ցանկացած տիպի գործողություններից, որոնք կարող են հանգեցնել այդ երկրներում իշխող ռեժիմի տապալմանը:

«Սիրիայում տիրող իրավիճակը բացառիկ է, և բացի այդ, Բաշար Ասադն ինքն է կոպիտ կերպով խախտում միջազգային օրենքը»,-ասել է Քաթարի վարչապետ Համադ բեն Ջասեմ Ալ Թանին: Արաբական պետությունների լիգային գլխավոր քարտուղար Նաբիլ Ալ Արաբիի կարծիքով՝ ընդդիմությանը զինելը հավասարակշռության կբերի Սիրիայում հակամարտող ուժերը, որի արդյունքում կարագանա խնդրի քաղաքական լուծման հնարավորությունը: