Դավութօղլուն հրաժարական կտա Իսրայելի հետ գաղտնի բանակցելու փաստի ապացուցման դեպքում

Թուրքիայի արտգործնախարար Ահմեդ Դավութօղլուն հայտարարել է, որ պատրաստ է հրաժարական տալ և հեռանալ քաղաքականությունից, եթե թուրք ընդդիմությունը կարողանա ապացուցել Իսրայելի հետ նրա ունեցած գաղտնի բանակցությունների և Քաթարում Իսրայելի հետ համաձայնություն ստորագրելու փաստը: Այս մասին Դավութօղլուն հայտարարել է ուրբաթ օրը SKY Türk 360-ին տված հարցազրույցի ժամանակ:

«Թող ընդդիմությունը ապացուցի իր՝ Իսրայելի հետ գաղտնի բանակցության և Քաթարում իմ կողմից նրա հետ համաձայնագիր ստորագրելու փաստը: Եթե դա նրանց հաջողվի, ես պատրաստ եմ հրաժարական տալ և հեռանալ քաղաքականությունից»,-ասել է Թուրքիայի արտգործնախարարը:

Նախարարի խոսքերով՝ Իսրայելից ներողություն ստանալը հնարավոր է եղել միայն Թուրքիայի հաջող դիվանագիտության և Իսրայելի վրա ճնշում գործադրելու շնորհիվ:

Եկող շաբաթ իսրայելական պատվիրակությունը կժամանի Անկարա՝ «ազատության նավատորմի» զոհված անդամներին փոխհատուցում վճարելու հարցը քննարկելու համար:

Հիշեցնենք, որ Թուրքիայի և Իսրայելի միջև խզվել էին դիվանագիտական հարաբերությունները 2010-ին, երբ Գազայի հատված հումանիտար օգնություն տեղափոխող թուրքական Մավի Մարմարա նավը հարձակման էր ենթարկվել Իսրայելի կողմից: Զոհվել էր նավի վրա գտնվող 9 թուրք ակտիվիստ:

Թուրքիան Իսրայելից պահանջել էր պաշտոնական ներողություն խնդրել և զոհվածների ընտանիքներին փոխհատուցում վճարել:
Անցյալ ուրբաթ օրը ԱՄՆ-ի միջնորդությամբ Թուրքիայի և Իսրայելի միջև հարաբերությունների կարգավորման համաձայնություն էր ձեռք բերվել այն բանից հետո, երբ Իսրայելի վարչապետ Բենիամին Նեթանյահուն պաշտոնապես ներողություն էր խնդրել Թուրքիայից: